Siyudad magbutang og mga mobile market
Ang Cebu City Government nagplano sa pagpakatap og mobile markets sa matag barangay aron atbangan ang ang mga tawo nga namaligya og overpriced nga mga batakang palaliton.
Si Cebu City Disaster Risk Reduction and Management Council Chairperson Gerardo Carillo niingon sa Huwebes, Disyembre 30, 2021, nga ilang gipaabot nga ang mga nalambigit sa over-pricing mohunong na sa pag-supply tungod kay estrikto ang gobyerno sa pagmonitor sa mga presyo.
Dugang ni Carillo nga nakig-alayon na sila sa Department of Agriculture (DA) ug Department of Trade and Industry (DTI) aron mahatag ang mga suplay nga gikinahanglan sa mga mobile market.
Ang Kagamhanan sa Dakbayan nag-organisar usab og 10 ka teams nga gipangulohan sa City Legal Office aron molibot sa siyudad. Gibutang usab ang incident command system sa matag barangay alang sa maayong pag-monitor.
Dugang ni Carillo nga ang Business Permit and Licensing Office (BPLO) apil usab sa team aron matangtang dayon ang business permit sa mga establisemento nga makalapas.
Si Mayor Michael Rama nipagawas og kusganong pamahayag niadtong Miyerkules, Disyembre 29, batok sa mga tawo nga nagpahimulos sa sitwasyon nga dala sa bagyo.
“Bisan kinsa nga mopahimulos, mag-antos gyud sa kasakit sa ipahamtang sa balaod, lakip na ang pagdakop ug pagkapriso,” matod ni Rama.
Niadtong Disyembre 28, nasakpan sa dakbayan ang duha ka mga tawo nga namaligya og overpriced nga tubig mainom sa Carbon Public Market.
Apan matud pa ni Carillo nga wala pa silay napasaka nga kasong kriminal batok sa mga suspek kay ang ilang target kadtong mga dagkong magduduwa nga nag-hoard usab sa mga produkto.
“Daghan sa atong kaigsuonan ang nabiktima, please don’t take advantage of the situation,” matod ni Carillo.
Si Carillo niingon nga kadtong masakpan nga namaligya og mga produkto nga lapas na sa ilang suggested retail price pasakaan og kasong paglapas sa Republic Act No. 7581 kun The Price Act. (IRT)
