Ibones nabalaka sa pagsaka sa kaso sa Covid-19 sa NCR
Nabalaka ang Cebu City Health Department sa grabeng pagsaka sa mga kaso sa coronavirus disease 2019 (Covid-19) sa pipila ka adlaw nga nakalabay sa kaulohan.
Si Dr. Jeffrey Ibones, pangu sa CHD, niingon nga nabalaka siya sa pagbalik og saka sa mga kaso sa Covid-19 sa National Capital Region (NCR).
Base sa Biyernes, Disyembre 31, nga case bulletin, ang DOH nitaho sa 2,961 ka bag-ong mga kaso sa Covid-19 nga ilang natala.
Katapusang higayon nga nakatala ang nasod og labing minos 2,000 kapin nahitabo niadtong Nobiyembre 21, 2021.
Ang Octa Research naalarma ning kalit nga pagsaka sa mga kaso, nga sobra sa katunga nagagikan sa NCR.
Si Ibones niingon nga bisan tuod kon angay kini nga ikaalarma, apan ang Siyudad duna nay mga lakang nga giandam alang niini.
Masaligon siya sa Emergency Operations Center (EOC) nga gipangulohan ni Cebu City Councilor Joel Garganera nga dunay kapabilidad sa pagpugong nga makasulod ang bag-ong variant sa Covid-19, labina sa gikahadlukang Omicron.
Iya hinuon giawhag ang mga overseas Filipino workers (OFW) ug returning overseas Filipinos (ROF) sa pagmatinud-anon, motuman sa mga health protocol ug pag quarantine kanila.
Ang pamahayag ni Ibones giluwatan human usa ka Pinoy gikan sa abroad wa motuman sa quarantine protocol, niapil sa us aka Christmas party.
Ang biyahidor nagpositibo sa kagaw sa Covid-19 ug gi-isolate na karon.
Wa pa hinuoy natala nga kaso sa Omicron sa Sugbo, partikular na sa Cebu City.
Sa nasod, duna nay upat samtang suspect ang usa kay bana siya sa babayeng ikaupat nga kaso sa Metro Manila.
PAMAKUNA GIBALIK
Miabot na diay og 36,000 ka mga tawo ang nabakunahan og anti Covid-19 sa Dakbayan sa Sugbo sukad nibalik ang pagpamakuna sa Disyembre 21 nga giunhan sa Robinsons Galleria ug Cybergate, matod ni Ibones sa Disyembre 31, 2021.
Matod ni Ibones nga ang duha ka vaccination sites nakabukas dayon lima ka adlaw human sa bagyong Odette busa mapasalamaton kaayo siya sa management sa duha ka malls.
Kadaghanan sa mga gipamakunahan naa sa second dose samtang duna lay kapin sa 100 sa first dose nga wa untay plano, apan nagpabakuna.
Matod niya nga duna nay lima ka vaccination sites na karon nga bukas, sama sa Galleria, Cybergate, Shopwise Mambaling nga pulos iya sa Robinsons, SM City ug SM Seaside.
Daghan na sila og pop up sites sa mga barangay. (REV)
