Naga mosuhol sa mga residenteng motabang sa paglimpyo sa siyudad
By Arvie N Veloso
ARON makakuwarta ang mga residente sa dakbayan sa Naga human sa miigo nga kalamidad sa Sugbo, usa ka programa nga cash for work ang gitanyag sa Kagamhanan sa Siyudad alang sa magkugi nga mga konstituente niini.
Ang beneficiaries nga mahimong mga volunteers maoy motabang sa pagpanglimpyo sa Naga Park ug Boardwalk, lakip sab sa Poblacion area ug sa mga barangay diin sila nagpuyo.
Matag adlaw makadawat og suhol ang mga volunteers nga moabot sa P300.
Kini paagi sa kagamhanan nga matabangan ang mga residente nga makakwarta samtang makatabang usab sa mas dali nga pag hinlo ug pagpabalik sa kahapsay sa kadalanan ug mga barangay.
“Ni-initiate ug cash for work program ang City Government para sa labing apektado sa Bagyong Odette hilabi na sa kadtong wala nay pinuy-anan ug naa karon sa mga evacuation centers,” pahibawo sa LGU Naga.
Sa wala pa miigo ang bagyo sa Sugbo, nipahigayon pa ang Siyudad sa Christmas lighting sa Naga Park nga giduaw sa gatusan ka mga Sugboanon tungod sa maanindot ug mapasigarbo nga talan-awon.
Atol sa pag igo sa bagyo, apektado usab ang tourism attraction sa syudad.
Gawas niini, target usab sa kagamhanan nga makapang apod-apud og 25 kilos nga bugas sa 38,900 ka mga panimalay sa siyudad.
Sa uwahing datos sa kagamhanan, anaa pa lang sa 14, 474 ka mga panimalay sa syudad ang nahatagan og ayuda.
Nalakip na sa mga barangay nga unang nakadawat og ayuda ang barangay Tuyan, Inayagan, Colon, North Poblacion, East Poblacion, South Poblacion, Pangdan ug Central Poblacion.
Nangayo og igong pagsabot ug taas nga pasensya si Naga City Mayor Kristine Chiong sa mga residente ug huwaton lang ang schedule sa pag apod sa ayuda sa mga barangay./
Ang Naga usa lang sa mga lungsod nga naapektuhan og maayo sa bagyong Odette sa habagatang Sugbo.
Ang mga silingan niining mga lungsod sa San Fernando ug Dakbayan sa Carcar nga maoy giagian sa mata sa bagyo nagusbat usab.
Gibana-banang 80 porsyento sa mga balay nga gama sa light materials sa Carcar City nangaguba sa paghaguros ni Odette nga dunay gikusgong 240 kilometros ang pag-unos.