Banca natikyaob sa Lapu-Lapu; 6 mi-survive, nanglangoy sa baybayon
Unom ka mga tawo ang nangaluwas human natikyaob ang ilang gisakyang motor-banca samtang nagbiyahe dala ang mga batakang palaliton sa kadagatan sa Barangay Baring, dakbayan sa Lapu-Lapu, Huwebes, Disyembre 30, 2021.
Kini taliwa sa pagdili sa PCG sa pagbiyahe sa gagmay nga mga sakyanan sa kadagatan tungod sa kadagko sa mga bawod.
Si Nagiel Bañacia sa City Disaster Risk Reduction Management Office nitaho nga ang motor-banca padung sa Caubian Island.
Si Erlinda Garcia, kinsa usa sa mga naluwas, gidala sa Sta. Rosa Community Hospital alang sa tukmang pag-atiman human siya nakaangkon og mga samad sa iyang walang tuhod.
Ang nahabilin sa mga naluwas anaa sa maayong kahimtang, sumala ni Bañacia.
Matod ni Bañacia nga nakalangoy ang unom ka mga survivor sa baybayon sa Barangay Baring ug gitabang dayon sa mga residente sa maong dapit.
Si Garcia niingon nga ang ilang motor-banca nakasugat og dagkong mga bawod sa palibot sa Barangay Baring hinungdan nga natikyaob.
Sa weather bulletin niini nga giluwatan alas 5:00 sa hapon sa Biyernes, Disyembre 31, ang Philippine Atmospheric Geophysical Astronomical Services Administration (Pagasa) niisa og gale warning alang sa tibuok seaboard sa Visayas tungod sa mga balod sa kadagatan nga adunay kataas nga moabot ngadto sa 4.5 metros ug kusog sa hangin nga moabot ngadto sa 63 kilometro matag oras.
Gisuspenso na sa Philippine Coast Guard ang paglawig sa mga barko nga 250 gross tonnage paubos nga adunay biyahe gikan sa Camotes Group of Islands paingon sa mainland Cebu ug Province of Leyte isip preventive measure aron malikayan ang maritime incidents.
Una nang gitug-an sa Pagasa nga ang “shear line” o tail end of frontal System mao ang nagpatigbabaw nga weather system nga nasinati sa Kabisay-an nga gipaabot nga magpadayon hangtod sa Enero 3, 2021. / IRT
