Nangamatay sa Bohol misaka ngadto sa 94 - SunStar

Nangamatay sa Bohol misaka ngadto sa 94

Nisaka na ngadto sa 94 ang ihap sa mga tawo sa lalawigan sa Bohol, Central Visayas nga nangamatay sa pagkusokuso sa Bagyong Odette (internasyonal nga ngalan: Rai) sa Lunes, Disyembre 20, 2021.

Kini human nadugang ang 22 nga patay sa 72 ka mga nangamatay nga gitaho niadtong Dominggo, Disyembre 19, ni Bohol Gov. Arthur Yap sa iyang opisyal nga Facebook page.

Ang 94 nga namatay nga gikataho sa Lunes nahitabo tungod kay ang tanan nga 48 ka mga local government units (LGUs) sa probinsya nakasumite sa ilang mga taho sa Opisina sa Gobernador sa Bohol.

Sa 48 ka local government units (LGUs), ang lungsod sa Ubay ang nakatala sa labing daghang nangamatay nga 12. Gisundan kini sa mga lungsod sa Talibon, walo; Bien Unido, pito; Loon ug San Miguel nga adunay unom matag usa; ug President Carlos P. Garcia, lima.

Ang mga lungsod sa Inabanga, Catigbian, Buenavista, Guindulman ug Alicia nitala og tulo ka nangamatay matag usa.

Duha ka patay ang natala sa matag lungsod sa Maribojoc, Jagna, Valencia, Mabini, Pilar ug Candijay.

Usa ang natala sa matag lungsod sa Panglao, Batuan, Dagohoy, Loboc, Clarin ug Sagbayan.

Walay namatay nga natala sa Taglibaran City, ulohan sa lalawigan sa Bohol, ug sa mga lungsod sa Dauis, Balilihan, Lila, Anda, San Isidro ug Tri­nidad.

Samtang, wala usay natala nga namatay sa mga lungsod sa Duereo, Loay, Carmen, Dimiao, Sikatuna, Garcia Hernandez, Cortes, Corella, Alburquerque, Baclayon, Sevilla, Bilar, Sierra Bullones ug Danao. (IRT uban ni KAL)

Leave a Reply

Your email address will not be published.