NPA nga mitahan mas midaghan pa
Ni Edgar E. Fuerzas
TACURONG CITY — Mitaas pa ang ihap sa mga miyembro sa New People’s Army (NPA) nga misurender ngadto sa militar ug kapulisan.
Kini human nga lain na sab nga 13 ka mga sakop niini mitahan alas 2:00 sa hapon, Lunes, Disyembre 27, didto sa probinsiya sa Sultan Kudarat.
Mga NPA giingong sakop sa Daguma Front nga naglihok sa mga probinsiya sa Sultan Kudarat ug Maguindanao misurender ngadto sa puwersa sa 601st Brigade, Philippine Army.
Dala sa mga rebelde sa pagsurender ang ilang mga tag-as nga matang sa armas, anti-personnel mine, mga bala ug magazines.
Tinguha sa mga nahigutan nga magbag-o na sa ilang kinabuhi ug magpuyo nga malinawon uban sa ilang mga pamilya.
Samtang nakadawat ang 13 ka mga NPA og inisyal nga tabang gikan sa local nga panggamhanan sa probinsiya.
Nasayran nga kadaghanan sa mga mibalik sa sabakan sa balaod nga mga NPA mga lumad human nailad sa hanyag sa mga walhong grupo.
Subling giaghat ni 6th Infantry (Kampilan) Division Chief ug Joint Task Force Central Commander Major/General Juvymax Uy ang uban pang NPA nga anaa sa kabukiran nga mokanaug na sa patag ug mosurender aron matabangan sa gobyerno.
