2,000 ka mga MILF na-decommission na
Ni Edgar E. Fuerzas
COTABATO CITY — Anaa na sa 2,250 nga mga kanhing miyembro sa Moro Islamic Liberation Front (MILF) ang na-decommission na ilawom sa third phase sa decommissioning process niadtong Lunes, Disyembre 27, sa probinsiya sa Maguindanao.
Target sa gobyerno ug MILF nga ma-decommission ang 8,750 nga mga manggugubat.
Base sa kasabutang pangkalinaw, ang ma-decomission nga sakop sa MILF modawat og P80,000 nga Bangsamoro Transitory Family Support Package. Kantidad sab sa P20,000 ang Livelihood Settlement Grant gikan sa gobyerno.
Ang third phase decommissioning process magpadayon sa unang kuwarter sa 2022.
Una nang gipamahayag ni Presidente Rodrigo Duterte nga kadtong lihitimo nga manggugubat sa MILF mao ang ipailawom sa decommissioning process isip kabahin sa final peace agreement.
Nanghinaut ang Bangsamoro government nga madungagan pa ang tabang ngadto sa kanhi manggugubat sa MILF gikan sa gobyerno ug sa mga foreign donors.
