P2.3-M shabu makatag unta sa New Year - SunStar

P2.3-M shabu makatag unta sa New Year

By Jeepy P. Compio

GITUOHANG matagtag unta sa mga parokyano sa tulo ka mga suspek ang shabu nga mokantidad sa P2.3 milyon kon wala pa kini masakit sa mga pulis sa Ecoland Police Station ubos sa Davao City Police Office (DCPO) atol sa ilang buy-bust operation Disyembre 29, 2021, didto sa Barangay 5-A, Bankerohan Davao City.

Sa impormasyon gikan sa DCPO, ang mga suspek giila nga sila alyas Noyfox, 33; alyas Leo, 39, ug usa ka alyas Luhel, 49.

Sumala ni Ecoland police station commander Police Major Carol Jabagat nga dugay na sab nila gipanid-an ang idlas nga lihok sa mga dinakpan.

Alas 12:20 sa tungang gabii Disyembre 29, ang mga nahisgutan mikontak sa nagtakuban nga pulis kay mobaligya sa paliton sa poseur buyer, hinungdan nga gikasa dayon ang buy-bust.

Dihang nagmalampuson ang mga pulis, nakuha sa posisyon sa tulo ka dinakpan ang pito ka mga dagkong pakite sa gituohang shabu nga dunay street value nga P2.3 Milyon.

Kasong pagsupak sa Republic Act 9165 kun Comprehensive Dangerous Drugs Act of 2002 ang atubangon sa mga dinakpan didto sa korte.

Leave a Reply

Your email address will not be published.