Rama mibahad; Gwen miluwat og E.O.
Ipadakop ni Mayor Michael Rama kadtong mga negusyante nga nagpatuyang og pamahal sa ilang baligya.
Ang pamahayag sa mayor nitumaw human adunay duha ka ice plant sa Cebu City nga giingong nagbaligya sa ilang produkto direkta sa ilang mga karaang kustomer nga 300% ngadto sa 500% ang usbaw gikan sa orihinal nga presyo sa wala pa ang bagyo.
“Please don’t take advantage because if you take advantage, your enemy is me and please shape up before we will get you in too much trouble,” bahad ni Rama.
Usa ka negusyante ang nipahibawo sa Superbalita Cebu kinsa naggamit og ice sa iyang produkto nagkanayon nga sa wala pa ang bagyo, ang block ice ilang mapalit og P220 apan sa miaging mga adlaw, tag P1,000 ug adunay laing ice plant nga nagbaligya sa ilang block ice og P600.
Apan ang mensahe sa mayor dili lang para sa mga ice plant operator kon dili sa tanang business establishment sa siyudad nga nagpahimulos sa sitwasyon diin grabe ang kalisod sa mga Sugbuanon gumikan sa bagyong Odette.
Una niini, si Rama niingon nga iyang ipa-revoke ang ilang mga business permit kon mapamatud-an sa sa Business Permit and Licensing Office ug Cebu City Legal Office.
Samtang, tungod sa iyang nadawat nga mga taho nga dunay mga gas station ug mga tawo nga nagpatuyang sa pagpahimus pinaagi sa pagpamaligya og mahal kaayong presyo sa lana, si Cebu Governor Gwendolyn niluwat og kamandoan nga nagtakda sa mga presyo sa gasolina ug diesel sa nagkadaiyang mga dapit sa Lalawigan sa Sugbo.
Sa iyang Executive Order No. 50-A nga giluwatan sa Disyembre 22, apan moepekto sa Disyembre 23, si Garcia niingon nga human sa bagyong Odette, daghan na sa mga sakyanan maglinya sa gas stations.
Duna say mga gas station ug mga tawo nga nagpahimus sa kagamay sa mga establisemento nga nangabli ug kataas sa panginahanglan pinaagi sa pagpamahal og maayo sa matag litro sa lana.
Busa, nahukman ni Garcia ang pagtakda og mga presyo sa matag litro sa gasolina ug krudo sibo sa nahimutangan sa dapit.
Ang kamandoan ni Garcia molanat hangtod nga libkason sa Kapitolyo ang state of calamity.
Kadtong masakpan nga mosupak sa iyang EO, isyuhan og cease and desist order. (REV / PAC)
