MCWD mipaagas na og tubig nga 110,000 cubic meters per day
Ang Metro Cebu Water District (MCWD) nakapaagas na og 110,000 cubic meter per day para sa ilang franchise area, lima ka adlaw human sa bagyong Odette, Disyembre 22, 2021.
Ang maong gidaghanon sa tubig naglangkob sa 45% sa ilang kinatibuk-ang suplay sa wala pa nikuso-kuso ang bagyo sa Cebu City ug sa silingan nga local government units (LGU)s niadtong gabii sa Disyembre 16.
Gipadayag sa MCWD subay sa ilang official Facebook page nga mosaka pa ang tubig nga ilang mahatag sa publiko sa higayon nga makapasiga na ang Visayan Electric company sa ilang mga linya ug padayon usab ang pagpanaod sa water district og mga generator sets sa ilang mga pumping stations.
Atol sa pagpakig-atubang ni Mayor Michael Rama kagahapon sa mga tigbalita, iyang giasoy nga problemado sa tubig ang barangay Tisa, Lahug, Apas, Sambag-I, Kamputhaw, Kinasang-an, Basak Pardo, Talamban, Banilad, Bacayan ug Pit-os sanglit di kaabot ang agas sa tubig sa MCWD.
Apan ang mayor niingon nga posibleng aduna pay mga barangay sa patag ang wala ngadto sa hinay ang agas sa tubig.
Si MCWD Chairman Jose Daluz III nagkanayon nga ang tubig sa MCWD limpyo ug mahimong mainom diin sa kasamtangan, ang mga water tanker sa MCWD, Bureau of Fire Protection nagpadayon sa ilang water rationing sa mga barangay.
Matod sa mayor, ang nagkaproblema sagad ang mga barangay nga anaa sa lowland areas sanglit sa bukirang barangay dunay tinubdan sa tubig gikan sa kinaiyahan. (PAC)
