Duterte mimando pagprayoridad sa kuryente, tubig, housing materials
Gimanduan ni Presidente Rodrigo Duterte ang hingtungdan nga mga ahensya sa gobyerno nga unahon ang pagpahiuli sa suplay sa kuryente ug tubig sa mga lugar nga naapektuhan sa Bagyong Odette, matod sa National Disaster Risk Reduction and management Council (NDRRMC) sa Lunes, Disyembre 20, 2021.
Sa usa ka virtual press conference, ang tigpamaba sa NDRRMC nga si Mark Timbal miingon nga human sa iyang pagbisita sa Surigao ug Siargao Island, gimando ni Duterte sa NDRRMC nga unahon ang assessment sa gidak-on sa kadaot sa mga lugar nga apektado ug matubag ang mga kabalaka sa mga local government unit (LGUs); molihok isip crisis manager sa Surigao del Norte ug Dinagat Islands; paggamit sa mga bangka, barko ug tanang kahinguhaan sa paghatod sa mga suplay, kagamitan ug pagkaon; ipadala ang BRP Ang Pangulo sa Dinagat Islands ug Siargao aron magsilbing floating hospital; ipadala ang gikinahanglan nga medikal nga mga suplay; ug pagdugang sa mga kawani sa panglawas.
Gimanduan usab ni Duterte ang ahensya sa pagsusi sa seaworthiness sa mga barko sa Surigao del Norte ug Dinagat Islands aron madugangan ang paglihok sa paghatod sa mga pagkaon ug mga suplay sa maong mga lugar ug paghawan sa mga dalan ug paghatag sa gikinahanglang kagamitan sa LGUs.
Matod ni Timbal, alang sa Bohol ug Sugbo, gimando ni Duterte ang paghatag og prayoridad sa paghatag og bugas ug tubig, construction materials alang sa pagtukod pag-usab sa naguba nga mga balay, ug housing assistance nga prayoridad sa mga kabus; paghatag ug tabang sa kapuy-an; dugang pundo para sa pagresponde ug pag-recover sa bagyo; ug paghatag dayon og 200 ka units nga 15-horsepower generator alang sa water refilling system.
Matod niya nga ilang gitipon ang mga report gikan sa grounds ug isumiter ang report ngadto kang Duterte unyang hapon.
Gi-report sa NDRRMC ang 58 nga namatay nga direktang nalambigit sa Bagyong Odette. Sa ihap, siyam ang kompirmadong patay, samtang 49 ang padayon pang gi-verify. (TPM sa SunStar Philippines)