Balak: Usa ka hapon sa San Fernando

LEONEL QUILLO
San Fernando, Cebu

Bulok sa naglupad-lupad nga guryon
ang bulok sa kahapunon. Daw tayaong mga tubo
ang mga sakyanan nga nanaglumbay sa karsada.
Usa ka nagtuk-ong nga panganod ang simbahan
nga inanayng gisalipdan sa anino sa mga kahoy.
Samtang sa balay nga tataw ang sulod gikan sa
karsada, gibalita nga adunay mga puneraryang
nahutdan og mga lungon.
Dihay usa ka motorista nga nagpabulhot sa iyang
motorsiklo daw adunay gigukod.
Dihay nanagputing mga tawo nga nanagbitbit
og balloon gikang naghatod sa namatay nilang kabanay.
Nangandam nang mamauli ang mga trabahante
sa usa ka pabrika paingon sa kalabera nilang pamilya.
Daw bulok sa panganod ang bulok sa face mask
sa edarang nagkawankawan ang bungot
nga nagkabiba og sako nga ang iyang banig
mao ang mabagang lut-od sa abog kilid sa dakit
nga iyang tabi-tabian sa di pa siya matulog.
Sa kasadpan daw abog ang nanagbahigay
nga mga panganod.