3 ka pulis nga ‘missing’, mi-report na sa CCPO
Naka-report na sa ilang tagsatagsa ka police station ang tulo ka pulis nga unang gikatahong missing atol sa accounting sa Cebu City Police Office (CCPO) sulod sa duha ka adlaw human niigo ang bagyong Odette niadtong Huwebes, Disyembre 16.
Kini ang gipahibalo ni Police Lieutenant Colonel Ryan Devaras, deputy city director for administration sa CCPO.
Matod ni Devaras, kompleto na ang 1,099 ka personnel sa CCPO nga nagpasabot nga wala nay na missing human ang tulo nga gipangita ni Police Colonel Josefino Ligan sa miaging adlaw ang naka pahibawo na nga naa ra sila sa luwas nga kahimtang.
“Actually naka-report na tanan accounted na sila,” matod ni Devaras.
Gihatagan og tagal ni Ligan ang tulo nga kinahanglan nga makit-an sila ug kon dili ideklarar sila nga missing o ba kaha ipaubos kini sa imbestigasyon sa kasong administratiba.
Dugang ni Devaras, kay nakaabot sila sa deadline wala nay himuon nga imbestigasyon ug mipasabot usab ang tulo nga tungod sa gidangatan sa ilang panimalay ug ang problema sa pagbalik sa police station tungod sa mga nakaali nga kahoy, wala sila dayon maka-report.
Samtang mipadala na usab og dugang pwersa ang Police Regional Office (PRO) 7 sa kapulisan sa dakbayan sa Sugbo gikan sa Regional Mobile Force Battalion (RMFB) 7 nga nangabot niadtong Martes, Disyembre 21, nga gipang-apud-apod na usab sa 11 ka police stations.
Moabot ngadto sa 72 ka personnel ang gi-augment sa PRO-7 nga moabag sa ilusad unya nga relief ug clearing operations sa kadalanan sa dakbayan nga dili pa hingpit nga luwas agi-an sa mga motorista.
Motabang usab sila sa pagpatuman sa kahusay ug kalinaw ilabi na nga bag-o pa lang nabiktima ang siyudad sa ka bangis ni bagyong Odette.
Ipakatap usab sila sa kadalanan isip police visibility lakip na sa mga dapit nga adunay daghang mga tawo nga nanag linya sa ATM outlets ug supermarkets.
Wala pa hinuon masayod si Devaras kon kanus-a mangabot ang gisaad ni PNP Chief Police General Dionardo Carlos nga augmentation gikan sa laing rehiyon nga wala maapektohi sa bagyong Odette.
Dako og matabang ang dugang personnel gikan sa laing rehiyon sanglit daghan pa nga atimanonon sama sa pagpanghawan sa kadalanan, dugang ni Deveras. (AYB)
