Pag-withdraw over-the-counter gidasig
Nipasalig ang Cebu Bankers Club (CBC) nga dunay igong pundong salapi ang mga banko sa Sugbo ug niawhag sa katawhan sa pag-withdraw og kuwarta pinaagi sa over-the-counter inay molinya sa automated teller machines (ATMs).
Si Michelle Co-Lin, presidente sa CBC, nagkanayon kagahapon, Disyembre 20, nga ang pagkuha og kuwata pinaagi sa ATM maoy labing dali ug sayon apan ning panahona nabalda tungod sa pagkawala sa power ug dili maayong signal sa telcos.
“Ninety-five percent of the banks are open. So, we are advising the public to visit their banks and make transactions over-the-counter,” matod ni Lin.
“Banks have enough cash. That’s why we really opened today to reload. We have more than enough, especially that the Bangko Sentral ng Pilipinas is also open to serve us,” dugang ni Lin.
Gawas sa hagit karon sa ATM nga mamaayong dagan, ang operasyon sa banko karon nagdepende sa generator sets. Kon mahutdan kini og fuel, ang operasyon sa banko maapektohan.
“The issue is more on the gasoline for our generation sets so we can operate online and for our telcos to be more stable for the ATMs to run smoothly. If we could request our local government units to give banks a priority lane in gasoline stations for refueling this would be of big help to everyone,” dugang ni Lin.
Si Lin nihangyo sa publiko sa pagsabot kon ang mga banko nipakunhod sa ilang oras sa pag-abli aron makapauli ang ilang mga kawani og sayo, nag-apas usab sa kaminos sa sakyanan.
“But we don’t close our banks if we still have clients inside to serve,” pasalig ni Lin sa publiko.
Human sa pakusokuso sa bagyong Odette (Rai) niadtong Huwebes sa gabii, Disyembre 16, 2021, nagsugod ang kataas sa linya sa tanang ATMs sa dakbayan aron pagkuha og kuwarta nga ilang ipamalit og pagkaon, panginahanglanon sa panimalay ug uban pa.
Giparalisar ni Odette ang paggamit sa digital payments ug ubang online payment methods, diin nahimong uso ug sayon sa panahon sa pandemiya sa Covid-19.
Sumala ni Lin, ang usa ka ATM dunay sud nga dili mominos P3 milyunes cash apan ang reloading nahimong problema sa pagkabalda sa sistema human sa bagyo.
Samtang, ang Bankers of Association of the Philippines niingon nga ang head offices sa universal ug commercial banks nakig-alayon na sa Bangko Sentral ng Pilipinas (BSP) ug BAP alang sa pagtabang.
Ang Cebu branches gisuportahan sa ilang head offices alang sa pag-ayo sa ilang infrastructure requirements. (KOC)
