Diputado: Maldita si Odette
by Salvador Diputado
Cuentas Claras
Hilabihan ang kamaldita ni Odette. Gikusokuso og maayo ang tanang lugar nga maagian, apil na ang maabot sa iyang kabangis. Kusog nga hangin ug kusog nga ulan ang iyang pulipulihon og gamit, usahay dunganon gyod. Tungod sa kakusog sa unos, kini nahisama sa usa ka hayop nga hilabihang kabangis.
Human molabay ang pipila ka oras nga kamaldita, mibiya lang pod si Odette ug hilabihan kadako ang kadaot.
Giguba niya ang kabalayan, gitangtang ang mga atop, gilunopan ang sulod sa mga balay ug nangaguba ang tanang naagian sa iyang kusog nga ulan o hangin.
Bisan ang mga puthaw nga atop sa taas nga mga building, iyang gilangkat ug gilupad kini padung sa mga silingang kabalayan, adunay mga tawo nga naigo ug namatay o nasamdan, unya aduna pod mga kabalayan nga naguba kay maoy gitugdonan sa mga nanglupad nga mga puthaw nga atop.
Gipatumba pod niya ang mga poste sa kuryente sa kilid sa kalsada, hasta mga dagkong kahoy, gipilo pod niya ang mga puthaw nga mga atop sama sa papel lang, tungod sa kakusog sa hangin.
Human ipatagamtam ang iyang kabangis, dako nga kadaot ang iyang gibilin. Walay kuryente ug adunay blackout sa tanang lugar nga iyang naagian.
Wala pod moagas ang tubig ug maoy hinungdan nga naglinya na lang ang mga tawo aron mopalit sa mineral water, apil na ang tubig para panghugas, pang-kaligo, ug panglimpyo.
Tungod sa kadaot sa mga malls ug mga department stores, kasagaran kay serado kini sila ug maoy hinungdan nga naglisod ang mga tawo pagpangita sa ilang inadlaw nga pagkaon. Kadtong nagtrabaho sa mga malls ug department stores, wa na poy trabaho. Kon way trabaho, wa poy sweldo. Kon way sweldo, mag-unsa na man lang ang ilang mga pamilya?
Tungod kay blackout, dili magamit ang mga credit o debit cards kay patay man ang mga ATM machines. Dili pod modawat ang mga pipila ka nangabli nga mga tindahan o patigayon og credit o debit card kay iluwa man kini. Cash gyod ang gikinahanglan. Kon way cash, dili kapalit og pagkaon.
Tungod pod kay blackout, gawas pa sa pagpangatumba sa mga transmission towers ug lines, wa poy signal ang Smart o Globe o Dito. Dili magamit ang mga cellphones aron mahibaw-an ang kahimtang sa mga pamilya nga atua sa laing lugar.
Taas kaayo ang linya sa mga sakyanan ug mga tawo nga gusto mopalit og gasolina o krudo.
Taas ang naglinya para mopalit og tubig.
Taas ang linya sa mga pipila ka ATM outlets.
Taas pod ang linya sa mga tawo nga gusto mosulod aron mopalit og mga pagkaon o kinahanglanon sa panimalay.
Unsa kahay mahitabo kon hasta sunod semana, o hasta matapos ang bulan sa Disyembre, mao kini ang sitwasyon?
Unya, human sa maldita nga Odette, aduna na pod kuno lain nagsunod. Susmariosep, unsaon na lang?
