Nalzaro: #Bangon Sugbo
by Bobby Nalzaro
Saksi
Nalukapa ug nasukamod kita karon gumikan kay biktima man kita sa usa ka katalagman nga mugna sa kinaiyahan.
Walay makapugong sa mga kalamidad nga ingon niini gumikan kay gimbut-an man kini sa Labaw’ng Makagagahum. Bisan pa man sa atong pagkalukapa, mobangon ug mabarug ra gihapon kita.
Niadtong Huwebes sa gabii, Disyembre 16, nihamag kanato ang makusog nga bagyong Odette nga gihulagway sa taga Pagasa nga kinakusgan nga bagyo nga misulod ug mihampak dinhi sa nasud sukad niadtong super typhoon Yolanda nga miigo diha sa Leyte ug Samar provinces niadtong 2013.
Ang Odette susama sa gikusgon sa bagyong Ruping nga miigo sa Sugbo niadtong 1990 apan mas daghan og dakong kadaut ang namugna niini.
Ang maong kasinatian maghatag kanato og leksiyon nga ang atong pagpangandam sa mga katalagman nga sama niini dili pa gyud diay igo. Kay si kinsa ba god ang magdahum nga ingon niadto ka kusog ang maong bagyo?
Kana bang kompiyansa ug sobra ang pagsalig. Ang uban wala mamakwit bisan kon namiligro ang ilang mga lugar kay kompiyansa lagi. Sa dihang mihapak ug mikuso-kuso na ang bagyo, diha na ngayo og panabang.
Halos tanang lugar wala pay kuryente. Kay dili man usab mo-energize ang Visayan Electric Company (Veco) kon dili ma-areglo ang ilang mga linya ug poste kay kuyaw man og adunay makuyentihan ug momugna og sunog. Ug gumikan kay wala may kuryente, apektado usab ang supply sa tubig. Dili maka bomba ang MCWD kay ang ilang mga pumping stations nagdepende man sa elektrisidad. Putol gihapon ang komunikasyon ug dili pa normal ang signal sa mga cellular phones.
Nagnihit ang supply sa pagkaon, tubig ug gasolina. Naglinya ang mga tawo ug sakyanan aron makapalit og gasolina. Naglinya ang mga tawo sa mga grocery ug mga supermarket. Hinaot nga dili mamintaha ang mga negosyante nga motago sa mga produkto ug mopataas sa ilang mga presyo.
Pila ka adlaw Pasko na. Hinaot nga magmalipayon gihapon ang inyong Pasko. Makabangon ra ta.#Bangon Sugbo.
(bobbygnalzaro@gmail.com)
