P100K balor sa mga pabuto nasakmit; pabuto hinungdan sa sunog sa Brgy. Tisa
By Arnold Bustamante
WAY natala ang kapulisan nga adunay nalandig sa tambalanan nga nabiktima sa pabuto atol sa pag saulog sa Pasko.
Sa talaan sa Operations Branch sa Cebu City Police Office (CCPO), way bisan usa nga nalandig sa mga publiko ug pribadong tambalanan sa dakbayan nga nabothan sa mga firecracker.
Matod ni Police Lieutenant Colonel Clark Arriola, hepe sa City Intelligence Unit (CIU) sa CCPO nga malinawon ang Pasko tungod kay bag-o pa mikuso-kuso ang bagyong Odette sa Sugbo ug kadaghanan nabiktima sa maong kalamidad.
Apan bisan pa man niini pabuto ang hinungdan sa usa sa duha ka mga sunog nga miulbo diin misulod, matod pa, ang kwitis sa usa ka balay sa barangay Tisa nga mikalas og usa ka kinabuhi.
Giklaro hinuon ni Arriola nga sa wala pa ang Pasko, gimandoan ni Police Colonel Josefino Ligan, hepe sa kapulisan sa siyudad sa Sugbo, ang tanang hepe sa 11 ka police stations nga hingusgan ang pagsakmit sa mga pabuto nga gipamaligya sa kadalanan.
Rason niini nga way gitugot nga firecracker zone sa tanang barangay nga nagpasabot nga wala itugot nga adunay magpabuto bisan asang lugar sa dakbayan sa Sugbo.
Mamahimong peligro kini sa sunog tungod kay daghan mga dahong laya gikan sa mga kahoy nga nangatagak tungod sa milabay nga bagyo ug dali ra maduktan sa kayo.
Moabot sa P100,000 nga balor sa nagka lain-laing matang sa mga pabuto ang nasakmit sa onse ka police stations nga gitakdang gub-on sa mosunod nga mga adlaw.
“Ang atong city director of course with the instruction of our mayor nga nang confiscate gyud ta og mga individuals nga naay firecrackers kay during that day wala man gyud tay gi identify nga firecracker zone. So, buot ipasabot nga dili gyud allowed si kinsa man ang magpabuto during that day,” matod ni Arriola.
Magpadayon ang pagpanakmit sa kapulisan sa mga pabuto ilabi na nga ilang napanglantawan nga mas daghan ang mamalit ning nagsingabot ang pagsugat sa Bag-ong Tuig.
Giklaro hinuon ni Arriola nga way dakop nga himuon sa mga police station sanglit ang mando mao ra ang pagbawi sa mga pabuto.
Awhag sa kapulisan sa siyudad sa Sugbo sa publiko nga likayan lang una ang pag gamit sa firecrackers ilabi na nga peligro pa sa sunog tungod sa mga ugang sanga sa kahoy nga naa pa sa kadalanan ug duol sa kabalayan agi ni bagyong Odette.
