Editoryal: Naangin sa pulitika
DUNAY P236 milyunes nga natigom ang Kagamhanan sa Dakbayan sa Lapu-Lapu nga calamity fund aron itabang sa mga Oponganon nga nangabiktima sa bagyong Odette.
Gipasar sa Lapu-Lapu City Council nga way bisan usa nga nibabag ang giduso nga calamity fund, apan hangtod karon, wa pa ni maapod ngadto sa 30 ka mga barangay, kadaghanan niini nakaangkon og grabeng kadaut, labina sa duol sa kadagatan ug naa sa isla.
Ang Konseho gusto nga idiretso ngadto sa matag barangay ang hinabang ug dunay gihisgutan nga gidak-on sa pundo nga gahin sa matag dapit. Wa makauyon ang mayor kay alang kaniya di patas ang bahinay.
Gusto usab sa mayor nga ang City Social Welfare and Devt. Office maoy moapod-apod sa hinabang, di ang mga barangay kapitan. Mao ni nga wa pirmahi sa mayor ang pagpagawas sa pundo.
Niawhag siya sa mga konsehal pagpahigayon og special session alang sa pagpalabang sa Annual Investment Plan (AIP) ug sa ingon maaprobahan ang calamity fund.
Kaning nahitabo sa calamity fund alang sa mga Oponganon resulta ni sa away tali nila ni Chan ug Kongresista Paz Radaza nga nag-atbang sa 2022 elections. Ang mayoriya sa mga konsehal kaalyado ni Radaza.
Sa ilang away, napagan ang hinabang alang sa mga Oponganon nga hangtod karon nag-antos pa sa kalisod sa kangitngit, kakuwang sa tubig ug pagkaon ug uban pa. Di lang kay kana, kadaghanan nagub-an og mga balay. Way klarong kapasilungan.
Bisan tuod kon di kaayo dako ang kantidad nga iapod, apan karon sa kalisod ang matag sentimo importante kaayo. Ang nakaparat lang kay ang pundo nga gikan sa buhis sa katawhan giawayan sa mga pulitiko.
Kagrabe na man pud nila, bisan sa krisis, nag-away sila. Way kalainan sila si Radaza ug Chan, puro pulitika ang gipalabi. Plantsaha na ninyo aron makuhaan ang mga pag-antos sa katawhan.
