Editoryal: Dulom nga Pasko?
Ikaunom na ka adlaw karon, Disyembre 22, human sa pagkusokuso sa bagyong Odette sa Sugbo ug sa ubang bahin sa Kabisay-an ug Mindanao niadtong Huwebes sa gabii, Disyembre 16. May nakita ba kamo nga kalamboan?
Dulom ang palibot, dili lang tungod nga wa pa mabalik ang kuryente, nagkatag pa gihapon ang mga basura sa kadalanan. Mga poste sa power nangatumba.
Naandan ning panahon nga nagkaduol ang adlaw sa Pasko, bisan sa panahon sa pandemiya, ang palibot alegre na sa mga dayandayan ug mabulukong kolor sa suga. Apan gipangwalis ug gitumba kini sa malditang ‘Odette’ sama sa taas nga Christmas tree sa Fuente Osmeña sa dakbayan sa Sugbo.
Nagpadayon ang taas nga linya sa gas stations, automated teller machines (ATMs), money transfer branches, pharmacies, tubig (labina sa mainom) ug ang ticketing offices o outlets napuno sa taas nga linya. Ting-uli na sa bakasyon sa Pasko. Makaluluoy nga tan-awon. Wala na masunod ang social distancing tungod sa kaagresibo sa mga tawo.
Timan-i, ang ng hulga sa Covid-19 ania pa. Bisan daghan na ang nabakunahan, apan dili kini hingpit nga panagang batok sa virus.
Taliwala sa pagkaapiki sa panahon, awhagon nato ang tanan nga mokooperar nga dili mosaka og balik ang kaso pinaagi sa pagtamod sa minimum health standards.
Labing importante karon ang daling pagbalik sa hingpit sa kuryente. Mokadena ang epekto niini sama sa sa pagkawagtang sa taas nga linya sa katawhan.
Mobalik ang kasadya sa Pasko bisan sa lawom nga kagabhion ubos sa kahayag sa sugang dagitab. Atong panawagan sa kagamhanan ug Visayas Electric Company (Veco) sa daling pagbalik sa power.
Bisan dulom ang Pasko, mapasalamaton kita nga buhi pa.