Migallen: Magsayo by knockout
by Jun B. Migallen
Taym pa
Way binumbahay o sinukliay sa mga masakit nga pulong ang gibuhian sa matag habig atol sa katapusang press conference sa world title fight ni Mark Magsayo ug Gary Russel Jr. didto sa Atlantic City, New Jersey, USA.
Karong adlawa, Dominggo sa Pilipinas, mahipunting ang tanang mga mata sa yutang Pilipinhon sa maong away, uban sa panghinaot nga kahatagan na og katumanan ang damgo ni Magsayo nga mamahimong world champion sa featherweight division.
Human sa nakapakurat niyang kadaugan batok ni Julio Ceja sa Agusto sa niaging tuig, nitumaw dayon ang pangalan ni Russel nga maoy sunod makontra ni Magsayo isip mandatory challenger sa iyang titulo.
Apan niadtong higayona, nipasulabi ang mga sugyot nga dili pa angay ikontra si Magsayo ni Russel, sa pagtuo nga kini hilaw ug dako pa kaayo og kulang kon iparang sa kampiyon kinsa kalima na makadepensa sa titulo nga iyang nalangkat niadto pang 2015 pinaagi sa pag-knockout ni Johnny Gonzales sa ikaupat nga round.
Ang gipakitang labok ni Magsayo batok ni Ceja maoy naghatag og dakong pagduda sa iyang kapabilidad. Iya man tuod nga natumba si Ceja sa first round, apan sa sunod nga mga hugna gilupig siya sa kusog ug sa palutsanay sa kumo hangtod nga nasagunto ug napaluhod siya sa ikalima nga round.
Niabot og laing mga hugna nga perming giatake sa bodega si Magsayo, apan sa ikanapulo ka round, wa damha sa kadaghanan, nga usa ka solid right straight ang nakalusot ug naigo sa apapangig ni Ceja nga maoy kalit nagpatiklop sa sihag na untang kadaugan sa Mexicano.Suwerte nga kadaugan maoy paghulagway sa kadaghanan.
Taliwala sa mga pagduda, si Magsayo, lumad nga taga Tagbilaran, Bohol, pursigido ug hugot nga niinsister sa iyang kaandam alang sa maong away ug tuod man nahatagan og katumanan ang iyang tinguha.
Gisanong sa iyang promoter ang iyang hangyo ug pangaliya.
Sa hamubo nakong panglantaw, tinuod, nga biya si Magsayo sa tapad tungod sa eksperiyensiya ug exposure sa 33-anyos nga si Russel.
Apan matod pa ni kanhi world champion Gerry Penalosa nga lisod kontrahon ang boksidor nga gutom sa kampiyonato ug determinado.
Laing butang diin nakabintaha ang undefeated Filipino fighter mao ang iyang kaaktibo sa niaging duha ka tuig kon itandi kang Russel nga wala gyud makaaway sukad niadtong Pebrero 8, 2020.
Gikataho usab nga adunay problema si Russel sa iyang pamilya, ning awaya wala usab ang iyang amahan nga mao ra ang iyang trainer kay bag-o lang kining giputlan sa tiil tungod sa sakit nga diabetes ug labaw sa tanan giingon nga mosaka kini sa ring nga adunay gamayng injury.
Wa man tuod ibutyag ni Russel kon unsa nga injury, apan ako nagtuo nga nakahibawo ug nakatimaho na ang kampo ni Magsayo niini ug kini maoy ilang pahimuslan alang sa kadaugan.
Posibling kining mga butanga maoy mahimong tikanganan ni Magsayo aron matuman ang iyang damgo. Magsayo by knockout. (jun.migallen22@gmail.com)
