Kumusta na si Pringle?
WALA pa’y nadawat ang Brgy. Ginebra Gin Kings og opisyal nga diagnosis kabahin sa angol sa tuhod nga nasinati sa ilang All-Star guard nga si Stanley Pringle.
Sulod na sab sa duha ka mga duwa sa Philippine Basketball Association (PBA) Governor’s Cup nga wala nakapakita og aksyon ang 34 anyos nga si Pringle.
Sa inisyal nga pagsusi, gikahadlukan nga nakasinati si Pringle og ACL tear.
“We still don’t know exactly where he is at yet. We’re getting different opinions,” batbat ni Ginebra coach Tim Cone nga napatik sa Spin.ph.
Hinuon bisan wala si Pringle, ang Gin Kings nakamaneho gihapon pagmakmak sa NorthPort Batang Pier, 108-82, unya nakaeskapo sila pinaagi sa overtime batok sa Phoenix Fuel Masters, 125-121, sa miagi nilang duha ka mga duwa.
Ang Gin Kings kasamtangang naa sa ikaduhang dapit dala ang 3-0 nga rekord.
“We still don’t know how long he’s gonna be out, what his timetable is,” dugang ni Cone.
Kausa pa lang nakaduwa si Pringle karon nga season diin miamot siya og pito ka mga puntos sa kadaugan sa Gin Kings batok sa Alaska Aces, 80-77, niadtong Disyembre 12, 2021.
Si Pringle, kinsa maoy Best Player of the Conference awardee sa 2020 Philippine Cup, maoy labing ulahing naapil sa listahan sa Gin Kings sa nangaangol nilang mga magduduwa sunod nila ni Mark Caguioa, Joe Devance, Aljon Mariano, ug Jared Dillinger.
Taliwala niini, mapasalamaton si Cone nga nasugakod gihapon nila ang nag-una nilang tulo ka mga tahas.
“I think it’s really good for our team, for our team confidence, that we can play tough down the stretch, and win tough games. I really appreciate that kind of effort that we’re playing (with), especially without having Stanley in the line-up for the last two games,” batbat ni Cone.
“Not having him in the line-up and being able to win these last two games is really quite satisfying.” (ESL)
