Magsayo gi-idol si Pacquiao

by Philip A. Cerojano

Sugdan ni challenger Mark Magsayo ang iyang panimpad nga mahimong world champion sama sa oportunidad nga gisubay kaniadto ni eight-time-division world champion Manny Pacquiao.

Andam ug naghinamhinam na si Magsayo nga makigpinaksitay karong adlawa batok ni world featherweight champion Gary Russell Jr., sa Atlantic City sa Amerika nga maoy una niyang away para sa world title.

si Magsayo dehado sa pustaanay 4-1 apan bisan paman niini, siya nagkanayon nga dili niya kini igsapayan ug iyang pildehon si Russell aron bawnon pauli sa Pilipinas ang WBC featherweight belt.

“This is my fight, my biggest fight, and I will do my best to win it and take this opportunity,” matod ni Magsayo sa DAZN News human sa ilang weigh-in kagahapon.

“I’m very excited about what I’m going to experience. I have Manny Pacquiao by my side, who has been my hero since I was a little boy,” dugang ni Magsayo.

Ang maong away ipahinungod ni Magsayo para sa iyang pamilya ug sa iyang idolo nga si Pacquiao.

“My idol, thanks to him, I am in boxing, so now I dedicate this fight to my family and my idol,” matod sa 26 anyos kinsa wala pay pilde sa iyang 23 ka away, diin 16 ang pinaagi sa knockout.

Si Russell naglisod og kuha sa iyang timbang sanglit sa una niyang patong sa weighing scale, nilapas siya og 226 gramos aron makuha niya ang ilang gisabotan nga timbang apan iya ra kining nakuha paglabay sa pila ka oras.

Wala usab makaaway si Russell kapin usa na katuig ang nakalabay nga maoy gusto nga pahimudsan ni Magsayo.

“I’m not worried that he didn’t make the weight, he made it on the second attempt, and it wasn’t that much wear and tear. Where my advantage lies is in the inactivity that Gary Russell has, because while he was out for two years, I held three fights, two in the last year,” padayag sa Pinoy boxer.

Si Magsayo mas taas itandi sa Amerikanong boksidor, mas kusgan siya ug sama sila kapaspas apan bisan unsay mahitabo iyang ihatag ang katapusan niyang abilidad sanglit giasoyan siya ni Pacquiao nga ang maong away maoy makapausab sa iyang kinabuhi ug makahatag og dungog sa nasod sa Pilipinas.

Gipadayag ni Magsayo nga iyang buhaton kutob sa iyang mahimo sanglit siya way pilde ug kini maoy labing una niya nga away sa pay-per-view ug siya usab ang main-event hinungdan nga dili niya usikan ang kahigayonan ug panahon para mahimo siyang world champion.