Mandaue namutang og mga kiosk alang sa online biz renewal application
by Mae Fhel K. Gom-os
Nagsugod na ang dakbayan sa Mandaue sa pagbutang og mga self-registration kiosk sa strategic nga mga lugar diin ang mga negosyante makahimo sa ilang online business applications ug renewal.
Si manlalaban Lizer Malate, pangu sa Business Permit and Licensing Office (BPLO) ning dakbayan, niingon nga usa kini sa ilang mga paagi aron maminusan ang pagkuyanap sa coronavirus disease 2019 (Covid-19) gawas sa paghatag og kasayon sa ilang mga kliyente.
Matod ni Malate nga ang pagbutang og self-registration kiosk maoy ilang dugay nang plano sa pagproseso sa negosyo sa siyudad. Matod niya nga nagplano sila nga magbutang og ingon niini sa mga estratehikong lugar sulod karong tuiga, apil na sa mga barangay.
Apan tungod sa pagkuso-kuso sa Bagyong Odette niadtong Disyembre sa miaging tuig, nagbutang dayon sila og self-registration kiosks sa J Center Mall sa A.S. Fortuna Street ug gawas sa BPLO niadtong miaging semana.
“Nagbutang nami og mga tablets sa atong one-stop-shop aron katong mga wala’y internet, katong mga wala’y suga, ug maglisod sa ilang signal, pwede moadto, dili kay mo walk-in magpa assist pero sila mismo magparehistro, “ ingon siya.
Gitataw niya nga gikinahanglan lang nila nga i-upload ang mga litrato sa ilang supporting documents sa pag-apply og business permit.
Apan alang niadtong nanginahanglan og tabang sama sa mga senior citizen, si Malate niingon nga adunay mga personnel nga makatabang kanila.
Matod ni Malate nga kadaghanan mipili sa pagproseso sa ilang aplikasyon o renewal sa business permits online, ilabina pinaagi sa Electronic Business Permit and Licensing System (eBPLS), nga gilusad sa miaging tuig sa pakigtambayayong sa Department of Information and Communications Technology (DICT).
Matod niya nga hapit 3,000 ka mga business permit ang na-isyu gikan sa 19,000 nga gipaabot nga mga aplikasyon sa Enero 21, 2022, o 25 ka adlaw sa wala pa ang gidugayon nga deadline sa Pebrero 15. Ang renewal sa business permit gihimo unta sa unang 20 ka adlaw sa Enero.
Si Malate niingon nga adunay mga 7,000 ngadto sa 8,000 ka mga negosyo nga malampusong mi-apply apan ubos gihapon sa verification.
Kon gihimo man nila kini nga mano-mano o sa naandan nga pag-setup, mahimo ra nila ma-cater ang mga 700 hangtod 900 nga mga negosyo matag adlaw.
