POC mitabang sa atletang naapektuhan ni Odette
Nitunol og pinansyal nga suporta ang Philippine Olympic Committee (POC) ngadto sa 10 ka surfers ug duha ka coaches sa Siargao hasta kang Cebuana Olympic marathoner Mary Joy Tabal.
Ang nangahisgutang mga atleta pulos naapektuhan sa paghaguros sa bagyong Odette nga miigo sa Visayas ug tipik sa Mindanao sa miaging semana.
Ang POC mipadangat og P10,000 matag usa nga hinabang ngadto sa mga nangahisgutan. Si Tabal lumad nga taga dakbayan sa Sugbo, nga maoy labing grabeng naapektuhan sa bagyong Odette.
Ang 10 ka surfers ug duha ka coaches sa Siargao pulos miyembro sa Philippine national team. (ESL)
