88% sa namatay sa Covid sa Enero wa mabakunahi

by Mae Fhel K. Gom-os

Kwarentay tres o 88 por­syento sa 49 sa kinatibuk-­ang nangamatay sa walo ka DOH-sentinel hospital sa Sugbo gikan Enero 1 hangtod Enero 19, 2022, ang wa­la mabakunahi.

Mao kini ang gibutyag ni Dr. Mary Jean Loreche, chief pathologist sa Department of Health sa Central Visayas (DOH 7), atol sa iyang briefing sa Visayas Vaccination Operations Center (VVOC) niadtong Biyernes, Enero 21.

Si Loreche niingon nga ang laing unom nga gitaho nga nangamatay hingpit nga nabakunahan batok sa Covid-19.

Ang ihap sa mga nangamatay, matod ni Loreche, mapugngan tungod kay adunay magamit nga mga bakuna.

Niana, gitataw ni Loreche nga ilang gihimo ang mga bakuna nga magamit sa mga ospital alang sa mga na-admit, bisan alang sa Covid o dili Covid nga mga hinungdan.

“Para kung siya ay wala pa’ng bakuna, pwede natin silang maingganyo at ma convince magpabakuna,” matod niya.

Gihimug-atan usab ni Loreche nga atol sa ilang pakigtagbo sa mga tambalanan sa Sugbo, nagkadaghan ang health workers nga nataptan sa virus taliwala sa hulga sa Omicron variant.

Siya niingon nga nakadawat usab siya og mga taho nga pipila ka mga local government units (LGUs) wala misunod sa updated guidelines alang sa isolation sa mga healthcare workers nga lima ka adlaw lang.

“We will be bringing it up with meetings sa LGUs specially with our emergency operations centers para po mapakawalan ang ating health care workers at frontliners so we can operate our beds for our covid patients,” dugang ni Loreche.

Apan giklaro usab niya nga ang ilang isolation mahimo usab nga malugwayan gikan sa lima ngadto sa pito ka adlaw kon sila adunay symptomatic ug adunay mga commorbidity.

Niadtong Enero 19, ang capacity utilization rate sa mga pribadong tambalanan sa Sugbo anaa sa 44 porsiyento sa 650 ka gigahin nga Covid beds.

Sa 286 nga na-admit nga mga pasyente sa Covid-19, a­dunay mga 364 nga Covid bed snga magamit.

Sa ihap sa nanga-admit nga mga pasyente, 161 niini asym­ptomatic o mild nga mga sintomas, 119 ang grabe, ug unom pa ang kritikal nga mga pasyente.

Alang sa publiko nga DOH-retained o sentinel hospitals, ang capacity utilization rate kay 65.4 percent sa 581 ka Covid allocated beds.

Adunay 201 ra nga magamit nga mga higdaanan kon gikonsiderar nga adunay 380 nga na-admit nga mga pasyente.

Apan giklaro ni Loreche nga kon adunay panginahang­lanon, ang DOH-retained hos­pitals mopalapad sa ilang ka­pasidad alang sa mga pas­yente sa Covid-19.