Christmas bonus, financial aid sa seniors, PWDs ipa-release ni Rama
Ipa-release na ni Mayor Michael Rama ang Christmas bonus ug financial aid sa Cebu City Hall employees, senior citizens ug persons with disability (PWD) sa dakbayan sa Sugbo.
Ang maong pamahayag giluwatan ni Rama sa Disyembre 20, 2021 upat ka adlaw human nga grabeng gikusokuso sa bagyong Odette ang 80 ka barangay ug kasikbit nga mga local government unit (LGU). KIni bisan kon dunay wala pa makapabakuna batok sa coronavirus disease (Covid-19) ning mao nga sektor.
“Tanan ihatag, City Hall, PWD and senior citizens. Ang pangutana, kadtong dili magpabakuna? Pasuwata lang sila og promisory note,” padayag ni Rama.
Ang distribution sa tag P3,000 nga financial assistance sa mga senior citizens ihatag sugod karong adlawa, Martes hangtod mahuman sa pagpanghatag diin house-to-house ang paagi sa distribution.
Ang mga PWD nga adunay samang kantidad nga nadawat, ang ilang schedule gisugdan niadtong Disyembre 11 , lima ka adlaw sa wala pa ang bagyong Odette.
Una niini, si Rama niluwat og direktiba nga dili niya ihatag ang Christmas bonus ug unahon og hatag ang senior citizens ug PWD nga nakakumpleto na sa ilang vaccines apan kalit lang nausab ang desisyon sa mayor.
Si Konsehal Dave Tumulak, kinsa moatbang ni Rama sa pagka-mayor maoy unang nanawagan nga i-reconsider ni Rama ang iyang nahiunang kamanduan.
Samtang ang mga City Hall employees, makadawat sa ilang P20,000 nga i-release sa mayor karong Huwebes o Biyernes human sa ilang clean-up drive sa 80 ka barangay.
Si Rama nagkanayon nga walay Christmas party ang City Government inay mohimo sila og pagpanglimpyo sa mga sagbot, basura nga salin sa bagyong Odette karong Miyerkules, Disyembre 22. (PAC)
