Editoryal: Mandatory service wa kinahanglana - SunStar

Editoryal: Mandatory service wa kinahanglana

Si Davao City Mayor Sara Duterte-Carpio, kinsa kandidata pagka bise presidente sa 2022 elections, niingon nga kon siya mapili, iyang himuon nga mandatory ang duha ka tuig nga military service sa mga Pinoy nga nagpanuigon og 18 anyos. Sayon ra kaayo ning sultihon, apan lisod buhaton. Unang babag niini mao ang galastuhan. Nagsangkiig man gani ang panudlanan sa kagamhanan sa pagsuweldo sa 150,000 ka personnel sa Armed Forces of the Philippines (AFP), unsa na kaha kon madugangan og mga 400,000? Matikyaob na gyud ang panudlanan sa kagamhanan.

Bisan si Defense Secretary Delfin Lorenzana supak niini tungod kay nakahibawo siya sa kabug-at sa galastuhan. Wa usab kini kinahanglana pagkakaron, matod ni Lorenzana tungod kay wa may gubat o nag-ung-ung nga gubat.

Angay lang kini sa mga nasod nga dunay hulga sa tugkaran sama sa South Korea nga hangtod karon naa pa ang dakong hulga sa North Korea ug Israel nga naa sa ilang tugkaran ang ilang mga kaaway. O kaha adunahan ang nasod sama sa Singapore.

Inay paburoton ang gidaghanon sa mga sundawo, palig-unon ang Armed Forces of the Philippines (AFP) pinaagi sa pagpalit og modernong mga kagamitan, sama sa jet fighters, mga barkong igugubat nga dunay kapabilidad sa missiles, helicopters alang sa mobility ug pang-atake. Mga missiles nga pangdepensa sa nasod gikan sa pagpangatake.

Kuwang kaayo ang gidaghanon sa atoang mga abyon nga pang transport. Wa gani ta makapamalit niini kay kuwang ang kwarta, unya magdugang na hinuon og mga personnel?

Naglisod man gani sa pagpamalit ang AFP og mga armas aron dunay magamit nga bag-o ang tanang mga sundawo mao nga gianam-anam o phase by phase.

Daghan usab mga sundawo nga wa pay kaugalingong balay.

Una padaghanon ang mga sundawo, palig-una una ang pundasyon sa AFP pinaagi sa pag-atiman sa mga sundawo ug pagpamalit sa tanang gikinahanglang mga armas ug kagamitan.

Leave a Reply

Your email address will not be published.