Pacquiao posibleng malabwan ni Canelo

By Erwin Lirazan

SA plano ni world super middleweight (168 lbs) champion Mexican Canelo Alvarez nga moambak og dako sa timbang aron ilugon ang korona ni World Boxing Council (WBC) cruiserweight (200 lbs) king Congolese Junior Makabu, hayan seguradong malabwan niya si Filipino boxing legend Manny Pacquiao.

Kini kon hisgutan ang kabahin sa inambakay og timbang.

Kon modaog si Alvarez batok kang Makabu, hayan mahimo siyang five-division world champion.

Layo ra man tuod kini sa pagsakmit ni Pacquiao og world titles sa walo ka managlahing weight divisions apan mas molabaw si Alvarez kon sa deperensya sa timbang nga ambakan ang hisgutan.

Si Pacquiao nagsugod og kampanya sa 105 lbs. hangtod ngadto sa 154 lbs., deperensya og 49 lbs.

Samtang si Alvarez nagsugod og kampanya sa 140 lbs. unya moambak ngadto sa 200 lbs., deperensya og 60 lbs.

Sa ka dako sa deperensya sa timbang, adunay mga natahap kon molampos ba si Alvarez ning maong tahas.

Apan giklaro ni Alvarez nga wala siya’y atrasan nga pagsuway ug masaligon siyang malupig niya si Makabu.

“How many? I really don’t care. Haters are always going to be haters,” batbat pa ni Alvarez sa iyang mga kritiko nga napatik sa www.boxingnews.com.