Mongaya: Marcos talawan - SunStar

Mongaya: Marcos talawan

by Anol Mongaya

Panahom

Makahimuot ang rason sa usa ka tigpaluyo ni Ferdinand “Bongbong” Marcos Jr. nganong nibalibad kini sa interview ni Jessica Soho karong adlawa.

Giimbitar man gud si Marcos Jr. kuyog sa laing upat ka mga presidentiables nga sila si Sen. Ping Lacson, Sen. Manny Pacquiao, Mayor Isko Moreno, ug Vice President Leni Robredo. Apan nibalibad si Marcos Jr.

Matod sa usa ka Thea de Luna diha sa Twitter, dili man kuno mandatory sa Commission on Elections (Comelec) nga motambong si Marcos Jr. Gawas pa siya ang labing taas sa survey, iya na sab nga napadayag ang iyang plataporma.

Kon mao man gani, wa say mando ang Comelec nga di motambong. Pero yuna pa, di ba bag-o lang nilihay si Marcos Jr. nga moatubang sa Comelec? Bisan og mag-zoom, di gyud pwede. Covid-19 kuno.

Apan abtik kaayong nagpa-in­terview sa radio ug nakasakay dayon og ayroplano aron mag-­ninong sa bunyag sa anak ni Cong. Duke Frasco ug Liloan Mayor Christina Frasco. Apo sab baya ni Gob. Gwen Garcia.

Tallano

Apan nagpadayon gihapon sa akong alimpatakan ang pangutana, unsay iyang gikahadlokan sa usa ka debate nga taas man siya sa survey ug makadepensa man kaha siya sa iyang plata porma.

Bisan pa man, gusto ko ma­minaw sa iyang personal nga pa­mahayag kabahin sa giingong hidden wealth sa mga Marcos ug sa istorya nga dili kini kinawat apan gikan diay sa Tallano gold. Matod pa, manghatag kuno si Marcos Jr. niining Tallano gold kon modaog man.

Makatubag man kaha siya niing mga pangutana? Nganong molihay man? Kay dili diay ti­nuod? Hadlok mabuking?

Sa Sugbo, atong nabantayan nga lig-on gyud si Marcos Jr. sa teritoryo ni anhing Ramon Durano nga mao ang 5th district. Samot pa nga ang mga Frasco nahimong suod kaayo ni Marcos Jr. Matod pa, ang partidong Bakud sa mga Durano ug mga Frasco parehong mosuporta kang Marcos Jr. Gipaabot karon nga mosuporta sab ni Marcos Jr. si Gob. Garcia labi na kon dili mosaka sa survey si Yorme Isko Moreno.

Hinuon, naninguha baya ang kampo ni Isko nga makapuntos sa lalawigan sa Sugbo labi na sa teritoryo sa mga Garcia ug Manny Pacquiao diha sa 3rd ug 7th district sa Sugbo. Bisan walay publicity, usa ka team ni Isko nga kuyog ang mga heavy equipment ang naa karon sa Sugbo. Ako kining nakita mismo nga nitabang sa pag-ayo sa mga kuryente ug sa dalan.

Ace ug Tingting

Apan giingon nga si Sec. Ace Durano walay presidentiable nga gidala. Samtang nagsigi sila og kuyog ni Vice Governor Junjun Davide nga nangampanya alang kang Leni Robredo, natural suporta sab kaniya ang Bakud.

Nakig-istorya sab kaniya ang ubang mga lig-ong party list groups ug naa say naglihok nga civil society groups luyo kang Ace.

Kahinumdoman, si Gob. Ting­ting dela Serna nagsalig sa mga non-governmental organi­za­tions sa iyang kampanya alang sa reelection kaniadtong 1995 batok ni Gob. Pabling Garcia, ang amahan ni Gob. Gwen Garcia.

Niadtong tungora, napildi si Tingting. Ang pangutana ka­ron, makapadaog na ba kaha og gobernador ang civil society hu­man sa 27 ka tuig? Ang local me­dia ug mga giingong mga political analysts wala makabantay niini.

Basura

Ato diayng lakbitan nga hangtod karon, abli ang ARN Central Waste Management Inc., kun ang sanitary landfill diha sa Binaliw, nga maoy nidawat sa basura sa tibuok Sugbo. Wa ko makasabot nganong gipundok pa sa SRP ang mga basura apan dali man sab nga gihakot padulong sa Binaliw.

Padayon kini bisan pa og wala pa gyud mabayari ang Arn Central sugod pa tunga-tunga sa miaging tuig. Makasabot ko nga nalawgaw ang pinansyal sa Syudad sa Sugbo niadtong wala na motambong sa City Hall si anhing mayor Edgardo Labella. Hinaot natarong na kini ni Mayor Mike Rama. (DM nako sa @anol_cebu)

Leave a Reply

Your email address will not be published.