Central Visayas nag-una sa kadaut ni Odette
by Cherry Ann T. Lim
Nag-una ang Central Visayas sa listahan sa mga rehiyon sa nasod nga adunay gikatahong casualties tungod sa Bagyong Odette (Rai), sumala sa National Disaster Risk Reduction and Management Council (NDRRMC).
Ang rehiyon usab nakaangkon sa labing daghang kadaot sa publiko nga imprastraktura, ang Department of Public Works and Highways (DPWH) miingon.
Hangtod sa alas 8 sa buntag sa Huwebes, Disyembre 30, 2021, ang NDRRMC nakalista og 1,627 ka na-report nga casualty sa tibuok nasod, nga mikabat ngadto sa 397 ang patay, 1,147 ang naangol ug 83 ang missing.
Ang Central Visayas maoy nag-una sa listahan niining tanang mga kategoriya.
Sa 397 nga gikataho nga namatay, 220 ang gitaho sa Central Visayas, gisundan sa 71 sa Caraga, 47 sa Western Visayas, 30 sa Eastern Visayas, 22 sa Mimaropa ug pito sa Northern Mindanao, matod sa NDRRMC.
Sa 1,147 nga nangaangol, nag-una usab ang Central Visayas diin 562 ang gikataho nga naangol, gisundan sa 508 sa Caraga, 59 sa Western Visayas, 16 sa Northern Mindanao, duha sa Mimaropa ug wala sa Eastern Visayas.
Sa bahin sa gidaghanon sa na-missing nga na-report, Central Visayas na usab ang dunay kinabag-an gikan sa 83 nga gikataho nga nawala, kay duna kini 32; gisundan sa Western Visayas nga adunay 31; Mimaropa, siyam; Eastern Visayas, unom; Caraga, lima; ug Northern Mindanao, wala.
Ang konseho niingon nga ang mga taho alang pa sa validation, bisan pa.
Ang Central Visayas naglangkob sa Cebu, Bohol, Negros Oriental ug Siquijor.
KADAOT SA IMPRASTRAKTURA
Sa usa ka pahayag nga gipagawas sa Huwebes, ang DPWH miingon nga ang Central Visayas usab nakaangkon sa labing daghang kadaot sa publiko nga imprastraktura, nga nagkantidad og hapit katunga sa kadaot.
Si DPWH Secretary Roger Mercado niingon nga ang danyos sa publikong imprastraktura anaa na sa P3.71 bilyon, diin ang Central Visayas mikabat sa P1.68 bilyones, gisundan sa Eastern Visayas sa P963.64 milyones, Western Visayas sa P549.65 milyones, Caraga sa P230 milyones, Mimaropa sa P157.83 milyones ug Northern Mindanao sa P134.34 milyones.
Sa P3.71 bilyones nga kadaot sa publikong imprastraktura, P2.87 bilyones ang kadaot sa mga dalan, P602.48 milyones sa mga tulay, P349.26 milyones sa flood-control structures ug P650,000 sa ubang publikong mga edipisyo, matod sa ahensya.
Sa bahin sa mga dalan nga gikataho nga dili maagian tungod sa Odette, nag-una sab sa listahan ang Central Visayas.
Sa 236 ka mga dalan nga gikataho nga dili maagian human sa bagyo, 72 sa Central Visayas, 55 sa Eastern Visayas, 43 sa Western Visayas, 26 sa Northern Mindanao, 21 sa Caraga ug 19 sa Mimaropa, sumala sa NDRRMC.
Apan, sa taho niini niadtong Disyembre 30, 11 na lang niini nga mga dalan ang nagpabiling dili maagian: walo sa Central Visayas, ug usa matag usa sa Mimaropa, Northern Mindanao ug Caraga.
MGA BALAY
Ang Bagyong Odette, nga mi-landfall sa Pilipinas niadtong Disyembre 16, 2021, mipaingon sa Kasadpang Kabisay-an pagkasunod adlaw, nakaapekto sa 6,071,790 ka tawo sa tibuok nasod, sumala sa Department of Social Welfare and Development (DSWD) sa ilang Disyembre 29, 2021 nga taho.
Ang bagyo nakaguba sa 630,732 ka mga balay, 200,117 niini ang kinatibuk-an ug 430,615 niini partially, ang taho sa DSWD.
Ang social welfare agency nagkanayon usab nga P207.38 milyones ang hinabang nga gihatag sa DSWD, local government units (LGUs), non-government organizations ug uban pa.
Sa laing bahin, ang DSWD Central Visayas (DSWD 7) miingon nga ubos sa ilang “Odette Relief Augmentation to LGUs,” nakahatag kini og P47.49 milyones nga kantidad sa hinabang sa mga survivor sa bagyo sa rehiyon sukad niadtong Disyembre 28.
Kini, human nihatag og 86,452 ka family food packs nga nagkantidad og P45.32 milyones ug 1,712 ka hygiene kits nga nagkantidad og P2.17 milyones sa mga LGU sa Sugbo, Bohol ug Negros Oriental.
