Mga aksyon sa PBA mobalik na sa MOA Arena, Enero 15
by Erwin S. Lirazan
Mobalik na ang aksyon sa Philippine Basketball Association (PBA) sa naandan niining panimalay nga mao ang Mall of Asia Arena sa Pasay City karong Enero, 2022.
Sa eskedyul nga gipagawas sa PBA gikan sa Enero 12 hangtod 30, 2022, ang mga duwa nga unang mobalik sa MOA Arena nakatakda karong Enero 15 ug 16, 2022.
Karong Enero 15, magsangka sa premirong duwa ang Blackwater Elite batok NorthPort Batang Pier unya mosunod ang engkuwentro tali sa Magnolia Ang Pambansang Manok Hotshots batok NLEX Road Warriors.
Sa Enero 16, magkombati sa premirong duwa ang Talk N’ Text Tropang Giga batok Terrafirma Dyip unya mosunod ang gikaintapang panagsangka sa San Miguel Beermen batok Brgy. Ginebra Gin Kings.
