Rama mangayo og P5B ni Duterte
Mangayo og P5 bilyunes gikan kang Presidente Rodrigo Duterte si Cebu City Mayor Michael Rama alang sa recovery sa Dakbayan sa Sugbo human gikuso-kuso sa bagyong Odette niadtong Disyembre 16.
Sa iyang press conference sa Disyembre 23, si Rama niingon nga iyang pangutan-on si Duterte kon “what help can Malacanang give to Cebu City?” kon magtagbo sila.
Kon mangutana si Duterte kaniya kon unsa nga tabang ang gikinahanglan sa Siyudad, iya kining sultihan nga nagkinahanglan ang dakbayan og P5 bilyunes nga pundo aron makabangon og dali human magusbat sa bagyong Odette nga nikuso-kuso nga nimugna og lapad nga kadaut.
Sila si Duterte ug Rama gikatakdang magkatagbo sa hapon o sa gabii sa Huwebes, Disyembre 23, sa pagduaw sa Presidente dinhi sa Dakbayan.
Si Rama nakahigayon sa pagpakigtagbo kang Duterte sa Huwebes sa gabii sa Brgy. Tisa, apan wa masayri sa Superbalita Cebu kon napadangat ba sa mayor ang iyang mensahe ngadto sa Presidente.
Laing pangayuon ni Rama kang Duterte mao ang “pressure power” aron mapaspasan ang pagpahibalik sa kuryente sa dakbayan sa Sugbo ug ubang mga dapit sa franchise area sa Visayan Electric.
Iya usab hangyuon si Duterte nga tabangan ang Siyudad nga mahibalik ang supply sa tubig.
Matod ni Rama nga ang gahin nga P1 billion sa Siyudad gikan sa calamity fund kuwang kaayo sa panginahanglan sa Dakbayan sa Sugbo kay sa kadaut sa kabalayan ug imprastraktura, naa na kini sa P1.7 billion.
“Give us billions so that we can start rebuilding Cebu City,” matod ni Rama nga maoy iyang isulti ngadto sa Presidente sa ilang panagtagbo.
Si Duterte una nang namulong nga ang maandam sa nasudnong kagamhanan P10 bilyunes lang, apan bahinon.
KURYENTE
Sa alas 9 sa buntag sa Huwebes, Disyembre 23, ang Veco, pinaagi sa ilang bulletin, nipahibawo nga naa sa 5,350 sa 474, 182 nila ka mgam customer ang nabalikan na sa ilang kuryente.
Moabot na usab sa 122 kun 22.4% sa 544 ka power lines ang ilang na-restore, dugang si Veco.
Samtang ang Metro Cebu Water District (MCWD) niingon nga niabot na og 112,800 cubic meters matag adlaw kun 47% sa supply ang ilang nahatag.(Lahi nga estorya sa pahina. 2).
MAG PASKO
Bisan pa sa kahimtang karon sa dakbayan nga naglisod sa tubig, pagkaon ug pipila ra ka mga dapit ang nisiga, tungod sa garbo ug kalig-on sa mga Sugboanon, magsaulog gihapon ang matag pamilya sa Pasko.
“Christmas will still be spent,” matod sa mayor. (REV)