Magsayo midaog sa PBC Knockout of the Year ’21
by Erwin S. Lirazan
Midaog ang makapaukyab nga kadaugan ni Filipino Mark “Magnifico” Magsayo (23-0, 16KOs) batok kang Mexican Julio Ceja (32-5-1, 28KOs) isip 2021 Knockout of the Year sa Premier Boxing Champions.
Gianunsyo sa PBC nga ang 10th round knockout nga kadaugan ni Magsayo batok sa lehitimong knockout puncher nga si Ceja nakahakot og 42.4 percent sa tanang mga ningboto sa Twitter ug YouTube polls.
Ang away, nga nahitabo niadtong Agusto 21, 2021 sa T-Mobile Arena sa Las Vegas, milupig sa kadaugan ni World Boxing Association (WBA) lightweight champion Gervonta Davis batok Mario Barrios, Jaron Ennis batok Thomas Dulorme, ug Anthony Dirrell batok Marcos Hernandez.
Si Magsayo, 26, migamit sa Facebook Live aron magpasalamat sa iyang mga sumosunod ug sa mga personalidad nga nag-agak kaniya sa nahisgutang kalampusan nga maoy nag-abli sa pultahan aron matuman ang iyang pangandoy nga makapanuktok na alang sa world title.
“Nag-live ako ngayon para magpasalamat sa inyo nang buong puso at tiwala na tayo ay manalo. Buti nanalo, hindi nasayang ‘yong mga boto niyo mga idol. Maraming marami salamat sa mga tunay na suporta diyan,” batbat pa ni Magsayo.
Dili sab gyud lalim ang naagian sa lumad nga taga Tagbilaran City, Bohol una niya nabuntog si Ceja.
Sa 1st round, napatumba dayon ni Magsayo si Ceja apan dali ra nga nakabangon ug naulian ang 29 anyos nga Mexican. Sa 5th round, nakabawos si Ceja sa pagtumba kang Magsayo.
Sa wala pa napaundang sa hingpit ni Magsayo si Ceja, naggukod siya sa scorecards human sa siyam ka rounds.
Ang Hall of Fame trainer nga si Freddie Roach, kinsa maoy naggiya kang Magsayo sa pagpakigbatok niini kang Ceja, migamit sa Instagram aron i-congratulate ang bag-o niyang estudyanteng Pinoy.
“Congratulations to Mark ‘Magnifico’ Magsayo on receiving PBC’s 2021 KO of the Year!” mensahe ni Roach sa iyang Instagram account.
Sa iyang official Facebook account, si Magsayo nag-post og hulagway nila ni Roach nga adunay mensahe diin nagpasalamat siya sa Kahitas-an ug sa dugay nang trainer ni Filipino boxing legend Manny Pacquiao.
“Thank you Lord, we won the KO of the Year! Thanks coach Freddie Roach and coach Marvin Somodio,” mensahe ni Magsayo.
Sa sunod niyang tahas, sagubangon na ni Magsayo ang labing dako niyang away nga maoy iyang gipangandoy.
Suwayan niya pag-ilog ang korona ni World Boxing Council (WBC) featherweight champion American Gary Russell Jr. karong Enero 22, 2022 sa Borgata Hotel Casino & Spa sa Atlantic City, New Jersey.
