Panghinaot sa NBA Phils. sa tuig 2022
by Erwin S. Lirazan
Gipadayag sa staff sa National Basketball Association (NBA) Philippines ang ilang mga panghinaot nga mahitabo sa liga sa tuig 2022.
Maporma ang team nga kinahanglan ni Dame
Dili ikalalis nga si Portland TrailBlazers All-Star guard Damian Lillard mao ang usa sa labing loyal nga superstars sa NBA. Sukad masukad, wala siya makahisgot nga aduna siya’y tinguhang mobalhin og laing team aron makabaton og kampyunato.
Gani, gidayeg niya og maayo si basketball legend Dirk Nowitzki nga wala gyud mibiya sa Dallas Mavericks hangtod sa iyang pagretiro human sa 21 ka mga tuig niyang pagduwa sa NBA.
Sa iyang pag-abot sa NBA, kaabag na ni Lillard si CJ McCollum sa pag-agak sa Trail Blazers apan dili ikalimod nga nagkinahanglan sila og dugang haligi aron mas dako ang ilang poruhan nga makaangkon og titulo.
Masulbad ang isyu kabahin ni Ben Simmons
Wala pa magsugod ang 2021-22 season, dayag na sa publiko nga gustong mobiya si All-Star pointguard Ben Simmons sa Philadelphia 76ers.
Mao kini hinungdan nga hangtod ning puntoha, wala gihapon moduwa si Simmons sa kasamtangang season.
Ang 76ers andam untang mobuhi kang Simmons kon makakuha sila og baylo nga sama sab og kalidad sa Australian star.
Apan hangtod karon, wala pa’y nakit-an ang 76ers.
Maalim na sa hingpit sila Butler ug Doncic
Parehong maayo og gipakita sila si Miami Heat forward Jimmy Butler ug Dallas Mavericks superstar Luka Doncic sa 2021-22 season apan napakgang ang duha ka All-Stars gumikan sa ilang pagkaangol.
Kon hingpit nga maalim sila si Butler ug Doncic, hayan seguradong mas moamag ang poruhan sa ilang tagsatagsa ka teams.
Bisan wala si Butler, maayo ra gihapon ang dagan sa kampanya sa Heat ug kasamtangan kining naa sa ikaupat nga dapit sa Eastern Conference dala ang 22-13 nga rekord.
Wala pa sab kaayo naunlod ang Mavericks ug anaa kini sa ikawalong dapit sa Western Conference dala ang 16-17 nga rekord bisan wala sila nakapahimulos sa gitawag nga Luka Magic.
Makakuha’g igong suporta si Jokic
Kinahanglang mohimo’g lakang ang Denver Nuggets aron makabira og mga magduduwa nga makahatag og saktong suporta sa kasamtangang MVP nga si Nikola Jokic.
Grabe ang gipas-an nga kalbaryo ni Jokic hilabi na kay wala pa’y klaro kon kanus-a makabalik ang iyang kaabag nga si Jamal Murray.
Sa pagpangulo ni Jokic, ang Nuggets nakakombati gihapon og insakto ug kasamtangan kining naa sa ikalima sa Western Conference dala ang 17-16 nga rekord.
Mag-uban na’g balik ang Splash Brothers
Kon mag-uban na’g balik ang Splash Brothers sa Golden State Warriors nga sila si Stephen Curry ug Klay Thompson, hayan angayan nang mangandam og maayo ang ubang teams.
Si Thompson giingong hapit nang makabalik og duwa gikan sa taastaas nga pagpaalim sa iyang angol.
Wala pa’y klaro kon kanus-a gyud siya makabalik apan gilauman nga mahitabo kini karon nga season. Nagpakondisyon na’g balik si Thompson ning puntoha.
