Pagpatubil og gas i-schedule na - SunStar

Pagpatubil og gas i-schedule na

by Philip A. Cerojano, Arnold Y. Bustamante

Gidili na sa Cebu City Government ang paglinya s­a mga sakyanan niadtong magpatubil sugod alas 6 sa buntag hangtod alas 8 sa gabii sa mga national roads sugod karong adlawa, Disyembre 22, 2021.

Samtang gas station ug ATM machines bantayan na sa kapulisan sa dakbayan sa Sugbo.

Sa tinguha nga dili mabalda ang trapiko, niluwat og direktiba si Mayor Michael Rama, makapatubil lang sa ilang mga sakyanan nga magpaabot sa kalsada gikan alas 8 sa gabii hangtod alas 6 sa buntag, diin dili huot ang trapiko.

Ang maong pamaagi gimugna sa City Government aron mapadali ang pag-agi sa mga sakyanan labi na kadtong nagkarga og mga basic needs ug aron mapaspasan ang paglihok sa mga heavy equipment nga maoy gigamit sa clearing operation sa mga natumbang kahoy, poste ug ubang debris diha sa dalan.

NO STOPPING

“No stopping allowed rule along our major thoroughfares, streets and designated roadways shall be strictly enforced,” tipik sa direktiba ni Rama.

Ang mosupak sa maong direktiba isyuhan og traffic citations sa Cebu City Transportation Office o temporary operators permit (TOP) gikan sa Land Transportation Office o Philippine National Police.

Si Atty. Gerry Carillo, chairman sa Cebu City Disaster Risk Reduction and Management Council (CCDRRMC) nagkanayon nga adunay Cebu City Fueling Depot nga gipahiluna sa South Road Properties nga mahimong makapatubil ang ubang pribadong sakyanan nga dili na-maatiman sa mga gas station.

Apan 20 litros ra nga gasolina para sa mga private vehicles matag adlaw ang ilang mahimong ma-tubil gikan ala 1 sa hapon hangtod na sa gabii samtang ang government vehicles, public utility vehicles ubang essential vehicles apil na ang media, mahimong maka-full tank, sanglit didto sa SRP dili sila makamugna og kahuot sa trapiko.

BANTAYAN

Nagbutang na og mga police personnel ang Cebu City Police Office sa gasoline stations nga gilinyahan sa daghang mga tawo nga nakamugna usab sa kahuot sa dagan sa mga sakyanan.

Matod ni Police Lieutenant Colonel Wilbert Parilla, deputy city director for operation sa CCPO nga gituyo kini aron malikayan ang panag-away sa mga nanag linya nga magpatubil.

Abagan sa mga police personnel ang management sa gasolinahan nga mahan-ay ang pag linya sa mga motorista.

“Mao na ang usa sa gi-direct ni CD nga kanang naglinya sa mga gasoline station i-assist na sila kon pananglitan ang linya sa motor linya nalang gyud na sa motor samtag lahi sad ang linya sa mga sakyanan. Then ato nang gipabawal ang magdalag daghan ug dagko na kaayo nga mga gallon,” pahibawo ni Parilla.

Nabantayan sa kapulisan nga gihimong negosyo sa uban ang gasolina diin adunay uban nga patungan og taas nga presyo.

Lakip sa gibutangan sa mga pulis ang ATM machines, water refilling stations ug mga supermarkets nunot sa mando sa Camp Crame.

Gidugang ni Parilla nga ilang gilikayan nga mahitabo ang krimen sa mga ATM machines ug ang kawat sa supply sa mga pagkaon.

Sa pagkakaron wala pa sila maka monitor nga adunay nahitabong looting sa mga dagkong tindahan sama sa bugas ug uban pa.

Hugot usab karon nga gibantayan ang mga mapahimuslanon sa panahon diin gipangtago ang mga supply sa pagkaon ug krudo.

Leave a Reply

Your email address will not be published.