Paul George napiang, di kaduwa’g 1 ka buwan

Makuhaan og pwersa sa Western Conference contender Los Angeles Clippers tungod sa pagkapiang ni superstar guard Paul George.

Matod sa Clippers nga di makaduwa og usa ka buwan si George tungod sa torn ulnar collateral ligament (UCL) sa iyang right elbow. Mopahuway una si George og tulo ngadto sa upat ka semana.

Human sa iyang pahuway mag re-evaluate ang team sa status ni George.

Ang 31-anyos nga si George na-injured didto sa ilang duwa batok Portland niadtong Disyembere 6 og gipapahuway kini’g lima ka sunodsunod nga duwa.

Mibalik siya og duwa karon semanaha batok San Antonio Spurs ug Sacramento Kings. Apan diriyot ra kini nakaduwa kay tungod sa torn UCL.

Ang UCL tear common sa baseball nga sport, moresulta kini sa Tommy John surgery.

Dako ang mawala sa Clippers kay si George man ang leading scorer sa team nga adunay 24.7 puntos, 5.5 assists ug duha ka steals matag duwa. Ikaduha pud siya sa team rebounds nga adunay 7.1 nga average.

Si George mao ang go-to player sa Clippers karon nga season sa pagka-sidelined sa iyang tandem nga si Kawhi Leonard.

Si Leonard miagi og surgery niadtong Hulyo para i-repair ang partially torn ACL niini. Wala pa mohisgot ang Clippers kon kanus-a makabalik og duwa si Leonard.

Ang Clippers karon anaa sa ikalima sa Western Conference standing nga adunay 17 ka daog batok 15 ka pilde.

Kahinumdoman nga niadtong 2014-2015 season wa makaduwa sa George tungod gihapon sa injury nga compound fracture sa iyang left leg. Aduna pud siyay surgery sa duha ka shoulders niadtong 2019. (RSC)