Hontiveros maoy modumala sa clearing operations sa Cebu City
By Ivan Rey Tan
SI Bise-Mayor Donaldo “Dondon” Hontiveros maoy gitudlo ni Mayor Michael Rama niadtong Lunes, Disyembre 27, 2021, sa pagdumala sa clearing operation sa dakbayan sa Sugbo human sa pagkuso-kuso sa Bagyong Odette.
Si Hontiveros nagkanayon sa pakighinabi sa Martes, Disyembre 28, nga nakig-alayon na siya kang Konsehal Jerry Guardo ug Eduardo Rama alang sa north ug south district sa dakbayan.
Dugang pa sa bise-mayor nga nakighinabi na ang Kagamhanan sa Dakbayan sa mga barangay kapitan sa paggamit sa ilang resources sa pagkolekta sa mga basura sa ilang area of responsibility.
“I hope in the next few days, madali na because we are working with the resources that we have right now,” matod ni Hontiveros.
Matod ni Hontiveros, gisusi usab sa dakbayan ang bag-ong sistema sa pagkolekta sa basura aron mapadali ang paghawan sa mga debris ug uban pang babag tungod sa bagyo.
Dugang pa ni Hontiveros nga nagplano ang Dakbayan nga mopakatap og mga tawo aron masiguro nga dili maglabay ang mga lumolupyo sa mga lugar nga nalimpyohan na sa mga debris.
Ang mga enforcer maoy moisyu og citation ticket niadtong mga tawo nga masakpan nga maglabay sa ilang basura, matod niya.
Daghan pang mga dalan sa Dakbayan sa Sugbo nga wa mahawani gikan sa nangatumba nga mga kahoy ug nangabali nga mga sanga.
Naa ra kini daplin sa dalan samtang mga basura anam nga nagtipun-og.
Sa laing bahin, giawhag ni Konsehal Dave Tumulak ang publiko sa pagtabang sa kagamhanan sa dakbayan sa paghawan sa mga basura nga gibilin sa Bagyong Odette.
Sa pakighinabi sa SunStar Cebu, Martes, Disyembre 28, si Tumulak niingon nga makatabang ang mga residente sa kagamhanan ilabi na sa mga interior nga bahin sa dakbayan nga dili daling masudlan sa mga garbage truck.
Si Tumulak, chairman sa committee on disaster risk reduction, safety, and climate change adaptation, modagan usab isip mayor sa dakbayan sa umaabot nga eleksiyon sa 2022.
Ang konsehal nagdumili sa pagkomentaryo kon unsa ang tubag sa Siyudad sa mga epekto nga dala sa bagyo.
“I will not comment on that because it might get politicized,” matod ni Tumulak.
Dugang pa ni Tumulak nga sa wala pa ang pagkuso-kuso sa bagyo, nagtigom na siya og grupo sa mga sibilyan nga boluntaryo aron mopahigayon og dinaliang clearing operations.
Dugang ni Tumulak nga nakaapod-apod na siya og bugas, noodles, ug tubig mainom ngadto sa kapin sa 5,000 ka pamilya sa dakbayan nga gidonar sa iyang mga higala ug ubang pribadong indibidwal.
Ang konsehal niapod-apod sa hinabang sa mga residente sa Barangay Inayawan, Quiot, Basak-Pardo, Mambaling, ug Calamba.
Matod ni Tumulak nga mas daghan ang ipang-apod-apod sanglit ang iyang mga higala nga taga Yokohama, Japan nipasalig na nga mohatag og food packs alang sa mga biktima sa bagyo.
