Opav nangitag paagi pagtubag sa blackout, kakuwang sa tubig

Ang Office of the Presidential Assistant for the Visayas (OPAV) padayong nangitag paagi aron matubag ang nagkadaiyang mga kabalaka human sa super typhoon.

Ang dakong gikabalak-an mao ang pagkapalong sa kuryente ug ang kakuwang sa suplay sa tubig sa Sugbo. Ang pagkuso-kuso ni Odette nakadaot sa transmission ug distribution lines sa Sugbo ug Bohol nga nakaapekto sa operasyon sa mga gasolinahan.

Ang Office of the President- Office of the Presidential Assistant for the Visayas, pinaagi ni Secretary Michael Lloyd Dino, nakig-alayon sa National Grid Corporation of the Philippines aron sa pagpaandar sa usa ka moth-balled powerplant sa Aboitiz Power Corp. subsidiary nga Cebu Private Power Corporation (CPPC). ).

Ang planta sa kuryente gihatagan og awtoridad nga makabalik sa operasyon tungod sa pagpataliwala ni Secretary Dino.

Matod sa Aboitiz Power, upat ka CPPC power generator units ang nagsugod sa paghatod sa 18 megawatts sa power supply direkta ngadto sa power distributor Visayan Electric (VECO) Dominggo sa buntag, Disyembre 19, 2021.

Kini maoy nakapahimo sa Veco sa paghatag sa gikinahanglan kaayong kuryente sugod sa mga priority areas sama sa mga ospital, pasilidad sa gobyerno ug Metro Cebu Water District pumping stations.

Ang CPPC naglaum nga mas daghan pa sa ilang power generation units ang mo-operate sa sunod nga 24 oras, nga makadoble sa power output ngadto sa 36 MW.

Tungod kay limitado kaayo ang inisyal nga power output gikan sa CPPC, ipadala kini sa mga tambalanan sama sa Cebu City Medical Center, Vicente Sotto Memorial Medical Center, Chong Hua Hospital, ug Perpetual Succor Hospital, ingon man sa MCWD ug Cebu Provincial Capitol.

Laing gikabalak-an mao ang kakuwang sa pag-operate sa daghang gasolinahan tungod kay nanginahanglan sila og mga generating set aron matubag ang mga kinahanglanon sa gasolina sa Sugbo.

Ang buhatan sa Department of Energy Visayas Field nihatag hinuon og kasiguruhan nga adunay igong suplay sa gasolina ang Sugbo sa mosunod nga 16 ka adlaw. Matod sa DOE, dugang gasolina ang ihatod sa Sugbo.

Problema sab ang tubig sa lalawigan sa Bohol ilabi na sa lungsod sa Loboc nga grabeng naigo ni Odette. Ang lungsod nga maoy labing grabeng naigo sa Bohol, nakasinati og pagbaha human sa super typhoon Odette.

Si Dino nakigsabot alang sa paggamit sa mobile water treatment plant gamit ang reverse osmosis technology gikan sa Vivant Corp ug Watermatic Philippines.

Ang mga ekipo gihatod na sa pantalan sa Tagbilaran Dominggo sa buntag ug dad-on sa Loboc, Bohol aron matubag ang kakuwang sa mainom nga tubig. Makahimo kini og 100 cubic meters nga mainom nga tubig kada adlaw.

Isip usa ka stop-gap measure, ang OP-OPAV mo-supply og 150,000 ka litro nga bottled water alang sa pag-apod-apod sa Bohol ug 500,000 ka litro sa bottled water alang sa Sugbo.

Sa pagkakaron, 24,000 ka litro na sa bottled water ang na-deliver sa lungsod sa Argao, nga maoy labing grabeng naigo nga lugar sa Sugbo.

Sa laing bahin, ang MCWD nga nagsalig sa kuryente sa Veco sa pag-operate sa ilang mga pumping station, nagplano nga dugangan ang gidaghanon sa ilang generator sets pinaagi sa pag-abang o pagpalit og dugang units.

Ang MCWD nangayo usab og tabang gikan sa Office of the President-OPAV aron madala ang 20 80-KvG generator sets gikan sa Manila ngadto sa MCWD pinaagi sa C130.

Nakig-alayon usab ang OPAV sa Department of Social Welfare and Development (DSWD) alang sa pag-apod-apod sa relief goods sa duha ka mga probinsiya.

Sa paggiya nila ni Presidente Rodrigo Duterte ug Senador Christopher Lawrence “Bong” Go, si Secretary Dino nihimo dayon og assessment sa mga probinsya sa Bohol ug Cebu niadtong Biyernes, Disyembre 17, adlaw human sa Bagyong Odette.

Niadto siya sa Bohol niadtong Biyernes, Disyembre 17, aron susihon dayon ang kahimtang sa yuta pipila ka oras human sa pagkuso-kuso sa maong bagyo.

Nakig-estorya ang Kalihim sa mga opisyal sa Bohol nga nagpahibalo kaniya nga nag-atubang ang Bohol sa kalisod sa suplay sa tubig ug kuryente.

Si Secretary Dino nipasalig sa tanang local government units sa Kabisay-an nga naapektuhan sa Bagyong Odette nga ang nasudnong kagamhanan nag-una sa pagtabang sa mga apektadong indibidwal ug pamilya.

“Gusto sa atong Presidente Mayor Duterte nga ipaabot ang bisan unsang dali nga magamit nga tabang sa mga apektadong biktima ug nakita namon nga kadaghanan sa mga kinahanglanon nga kinahanglanon pagkahuman sa Bagyong Odette mao ang pagkaon ug tubig,” gipasiugda niya.

Human sa iyang pagbisita sa Bohol, si Secretary Dino nihimo og aerial inspection sa nahisgutang probinsiya ug sa isla sa Probinsiya sa Sugbo.

Kauban sa Kalihim ang Visayas Command sa Armed Forces of the Philippines (AFP) Major General Robert Dauz atol sa maong inspeksyon.

Ang duha nihimo og aerial inspection gikan sa Bohol paingon sa Sugbo diin ilang nakita ang kadaot nga gihimo sa bagyo ilabi na sa mga dapit nga gibahaan sa Probinsiya sa Bohol. (REV, gikan sa PR)