Negusyante nga mipahimulos gukdon
SI Presidente Rodrigo Duterte mipasidaan ngadto sa mga negusyante nga mipahimulos sa higayon human mi-igo ang bagyong Odette, pinaagi sa pagpa-umento sa presyo sa mga nag-unang palitunon ug construction materials ilabi na ngadto sa mga lugar nga nagrabehan sa maong katalagman ang dakpon.
“I am just giving you the warning na ‘pag nahuli kayo ng DTI or nahuli kayo ng pulis — ang pulis because the jurisdiction dito sa putting a cap on the prices of goods belongs to — and even building materials, nasa sa iyo,” pahimangno ni Pres. Duterte atol sa iyang senimanang ‘Talk to the People.’
Matod pa sa opisyal nga iyang gitahasan ang kapulisan sa pag-ila sa mga violator base sa report nga gipadangat ni Trade Secretary Ramon Lopez.
“So nandito ka man, tell us if there has been a violation or violations during this time because we can identify them and the Philippine National Police, we will ask them to arrest the hoarders and people who are taking advantage of the situation,” pamahayag sa presidente.
Matod pa ni Lopez nga taliwala sa gipatuman nga ‘price freeze’ ngadto sa mga dapit nga na-igo sa bagyo nga magpabilin nga kasamtangang presyo niini, apan nasuta nga adunay mga negosyante ang mipasaka sa presyo sa produkto nga ilang gibaligya.
DINAKPANAY
“In fact, ang order ko po sa ating mga kasama na ‘yung mga enforcers natin ay talagang mag-aresto ng overpricing,” butyag ni Lopez.
Sumala pa nga aduna na silay mga nasikop didto sa Lalawigan sa Bohol ingon man sa Sugbo.
Ang maong mga dinakpan gipangayoan og subay kon unsay ilang rason nga nipataas sa presyo.
Nasayran nga adunay doble o triple nga patong sa presyo sa gasolina nga moabot ngadto sa P120 – P180 ang matag litro.
Nagkanayon si Lopez nga human sa nahitabong dinakpanay nakontrolar ang pagpasulabi og pasaka sa presyo sa basic commodities lakip na niini ang pagkaon, gasolina ug construction materials.
“But after po na-apprehend sila, actually ho, Mr. President, kino-correct ho nila ‘no. So tayo ho talaga nakatutok doon sa mga nabalitaan natin na mayroong mga pag-increase ng presyo,” pulong ni Lopez.
TALISAY CITY
Ang kapulisan sa Dakbayan sa Talisay nakasakmit og overpriced nga mga gasolina nga gibana-bana mokabat nadto sa P33,000 ang kantidad sa fuel.
Si Police Lieutenant Colonel Randy Caballes nagkanayon nga mihimo sila og tulo ka operasyon ngadto sa nagkadaiyang barangay sa dakbayan.
Kini human nga nakadawat og reklamo ang kapulisan gikan sa mga residente nga miabot ngadto sa P150 ang litro sa gasolina..
Sa gihimong operasyon adunay lima ka tawo ang nasikop.
Human sa pag-igo ni Odette ingon sa adunay nahitabong panic buying diin taas nga linya sa mga motorista ang nagpatubil sa pipila ka mga gasoline station nga nangabli niadtong higayona.
LAPU-LAPU CITY
Samtang ang hepe sa Lapu-Lapu City Police Office, P/Colonel Arnel Banzon mibutyag nga moabot ngadto sa 214 ka litro sa fuel ang ila nang nasakmit.
Ang gasolina gisulod sa binotelya nga softdrinks ug adunay containers ug adunay dili molabaw 20 ka tawo ang ilang nasikop nga mipahimulos sa higayon.
Dugang pa ni Banzon nga mahitungod sa curfew nga gipatuman sa bag-ong Executive Order ni Lapu-Lapu City Mayor Junard Chan mihatag sila og konsiderasyon niadtong mga essential worker nga maabtan sa curfew period gikan sa 9:00 sa gabii ngadto na sa 3:00 sa kadlawon. (PND, BBT, FVQ)
