Sobra na sa 100K ka customer napasigaan sa Veco - SunStar

Sobra na sa 100K ka customer napasigaan sa Veco

By Roger Vallena

SOBRA na sa 100,000 sa apektado nilang mga customer ang napasigaan sa Visayan Electric sulod sa mga dapit sa ilang franchise area sukad sila sa nagsugod sa pag-ayo sa ilang mga linya human sa pagkuso-kuso sa bagyong Odette.

Sa ilang bulletin sa alas 12 sa udto sa Martes, Disyembre 28, nipahibawo ang Veco nga nakapasiga na sila sa 118,734 sa ilang 474,182 ka mga customer, labaw og 20,000 itandi sa ilang bulletin sa Lunes sa udto, Disyembre 23. Ila na usab nga nabalik ang 313 sa 544 ka power line segments kun 57.5% sa ilang franchise area.

Sa mga alas 6 sa gabii sa samang adlaw, ila na usab nga napasiga ang mga linya duol sa mahinungdanon nga mga pasilidad sama sa tipik sa Burgos St., San Isidro Road ug ubang bahin sa San Isidro Road sa Dakbayan sa Talisay.

Ila na usab nga napasiga ang portion sa Lucio Lopez Drive, A Lopez St. ug L.P. Balaga Drive sa Dakbayan sa Sugbo.

Sa Dakbayan sa Sugbo sa mga alas 10 sa buntag, napahibalik na usab nila ang kuryente sa N. Bacalso Avenue ug Tres de Abril St., portions sa B. Rodriguez Extension ug portions sa N. Escario St.

Sa lungsod sa Consolacion, ila na usab nga napabalik ang kuryente sa portions sa Consolacion Tayud Liloan Road, portions sa Consolacion, portions sa Laray Rd. Tayud.

Gitataw sa Veco nga wa silay gitugtang mga personnel nga makapangayo og bayad sa pagpabarog sa natumba nga poste o pagkonektar sa linya nga naputol.

Kon dunay nahibaw-an, ilang gihangyo ang publiko sa pagpadala kanila og mensahe o tawag sa 230-8326.

Gipahibawo sa Veco nga sa Enero 31 ila nang mapasiga 100 porsyento ang ilang franchise area.

Leave a Reply

Your email address will not be published.