Pangandoy ni Magsayo matuman na
Matuman na ang dugayng pangandoy ni Filipino rising star Mark “Magnifico” Magsayo – manuktok na siya alang sa world title.
Ang lumad nga taga Bohol mosuway pag-ilog sa korona ni World Boxing Council (WBC) featherweight champion American Gary Russell Jr. karong Enero 22, 2022 sa Borgata Hotel Casino & Spa sa Atlantic City, New Jersey.
Si Magsayo, kinsa adunay 23-0, 16KOs nga rekord, nahatagan ning maong oportunidad human sa iyang makapaukyab nga TKO nga kadaugan batok kang Mexican Julio “El Pollito” Ceja (32-5-1, 28 KO’s) sa labing ulahi niyang away.
Ning away, gitumba ni Magsayo si Ceja sa 1st round apan gibawsan siya pagtumba ni Ceja sa 5th round. Sa 10th round, gitumba og balik ni Magsayo si Ceja ug mao kini ang nihuman sa away.
Si Magsayo, 26, mosagubang sa iyang ikaunom nga away sa Amerika ubos sa paggiya sa bantugang trainer nga si Freddie Roach.
Gawas kang Ceja, ang ubang dekalidad nga mga boksidor nga nalupig ni Magsayo mao sila si Mexican-Americans Pablo Cruz, Rigoberto Hermosillo ug Chris Avalos.
Batok kang Russell, mopatigbabaw na sab kaha si Magsayo?
Sa usa ka interbyu nga napatik sa www.philboxing.com, masaligon si Magsayo nga malupig niya si Russell gumikan kay grabe ang iyang pagpangandam alang ning gipangandoy niyang away.
Ang kampo ni Russell masaligon sab.
“Russell has been a force in the featherweight division for years with his dazzling abilities,” matod sa fight promoter nga si Tom Brown sa TGB Promotions.
“He will once again defend his title against a hungry and powerful opponent when he faces Mark Magsayo.”
Alang kang Brown, usa kini ka kulbahinam nga panag-engkuwentro ibabaw sa ring.
“Magsayo won this title shot from his impressive 10th round knockout of Julio Ceja last August,” dugang ni Brown.
“So Magsayo will seek to prove that he is the future of the 126-pound division by defeating the WBC featherweight king, a champ who has reigned for long time. Russell has proven worthy of his top spot with his 5 successful title defences.”
Si Russell adunay 31-1, 18KOs nga rekord. (ESL)