MCWD mipadala og tangke nga water purifier sa Barili; tubig mainom
BISAN sa mga hagit nga giatubang human sa bagyong Odette sa Sugbo, ang Metropolitan Cebu Water District (MCWD) wala magpanuko sa paghatag og tabang sa lungsod sa Barili dihang nanawagan si Rep. Pablo John Garcia og tabang aron matubag ang problema sa suplay sa tubig sa munisipyo.
Niadtong Disyembre 27, gipadala sa MCWD ang ilang Mobile Siphon Tank (MST) sa Barili, usa sa mga lugar nga grabeng naigo sa bagyo niadtong Disyembre 16.
Kini isip tubag sa hangyo ni Cong. Garcia, representante sa ikatulong distrito sa Sugbo, diin nahisakop ang Barili.
“With your equipment, we will be able to address one of the most pressing needs not only of Barili, but also of neighboring towns in the district like Aloguinsan and Pinamungajan, as well as those in the seventh district starting with Dumanjug,” matod sa hangyo ni Cong. Garcia.
Sa panagtagbo nila ni Gobernador Gwendolyn Garcia ug sa mga opisyal sa MCWD, ang gobernador nihangyo usab sa water district nga ihatag ang gihangyo sa ikatulong distrito.
Gimandoan dayon ni MCWD Acting General Manager Stephen Yee ang mga personnel sa MCWD Laboratory sa pagsusi sa sapa sa Barili kon ang kalidad sa tubig ma-treated ba ug ma-purify gamit ang MST.
Si Water Quality Division head Helen Aragones niingon nga tungod kay nakapasar sa test ang kalidad sa tubig sa sapa sa Barangay Campangga sa Barili, ila dayon nga gipadala ang MST nga gisakyan sa trak.
“Daghang salamat, MCWD pinaagi sa ilang Chairman Joey Daluz sa paspas nga resulta sa hangyo namo ni Gov. Gwen Garcia ug sa One Cebu aron masolbad dayon ning kinadak-ang suliran sa Barili karong panahona,” matod ni Kong. Garcia sa iyang Facebook page.
Ang truck-mounted MST nga mobalor og P15 milyones gidonar sa MCWD sa Japan International Cooperation Agency (JICA) niadtong 2016.
Ang Aragones sad makapaagas og tulo ka metro kubiko nga tubig nga limpyo ug mainom matag oras o 72 metro kubiko matag adlaw. Ang usa ka metro kubiko tumbas sa 53 ka sudlanan sa 5-gallon nga binotelyang tubig.
Ang MST usa ka state-of-the-art nga ekipo nga gihimo ug gigama sa Nihon Genryo Co. Ltd. sa Japan ug adunay kaugalingong generator set.
Aduna kini usa ka submersible pump nga gigamit sa pagsuyop sa tubig gikan sa sapa o bisan unsang mga tinubdan sa tubig sa ibabaw ngadto sa usa ka pundohanan sa tubig o dagkong mga tangke nga plastik.
Ang tubig gitigom sa una nga pundohanan sa tubig o plastik nga tangke. Dayon kini gisagolan sa polyaluminum chloride, usa ka matang sa disinfecting agent.
Dayon, ang liquid chlorine o sodium hypochlorite, usa ka disinfecting agent, idugang gamit ang electromagnetic pump sa dili pa moadto sa filter nga naggamit og espesyal nga matang sa balas.
Gikan sa filter, ang mainom nga tubig moadto sa ikaduha nga pundohanan sa tubig ug gitipigan ingon nga backwash nga tubig. Kini gigamit sa paglimpyo sa balas sa filter.
Ang pag-backwash o paglimpyo sa filter kasagaran buhaton ka usa sa usa ka adlaw sulod sa mga pito ka minuto.
Kon mapuno na ang ikaduhang tangke, awtomatik nga mapunta sa ikatulong tangke ang purified water nga adunay upat ka gripo nga magamit sa mga residente.
Niadtong 2013 dihang niigo ang Super Typhoon Yolanda sa amihanang bahin sa Sugbo, ang JICA ug MCWD nagdala og stationary MST sa Daanbantayan. (REV gikan sa PR)
