Editoryal: Malaumong Bag-ong Tuig! - SunStar

Editoryal: Malaumong Bag-ong Tuig!

Unang adlaw sa tuig karon, Enero 1, 2022, malipayon ug mabungahong Bag-ong Tuig. Matag unang adlaw sa tuig, nag-umido sa atong kasingka­sing ang daghang pangutana. Kumusta kaha ang akong kinabuhi ug panglawas ning tuiga? Wala na ba y katalagman nga motay-og sa komunidad? Han-ay ba ug malinawon ang nasudnong eleksiyon karong Mayo? Kini ug uban pa ang nagduwa sa atong hunahuna.

Usa kini ka natural nga reaksiyon sa normal nga tawo. Sukaranan kini sa mosunod nga aksiyon. Apan kon walay buhaton nga resolusyon o bisan sa pagpahiuli sa tul-id nga dan, tabla lang usab nga nahisama sa usa ka buang – ang kasuko ug kalipay nagpabilin sa hunahuna kanunay. Daghan kanato ang sama niini, pananglitan, ang nabaniog nga new year’s resolution gibuhat ba? o nakalahutay sa panaad?

Matag unang adlaw sa tuig, dili kapugngan nga daghan kita og mahunahunaan uban sa pagbalik-lantaw sa nangaging kasinatian. Ang epekto sa pandemiya sa Covid-19 nga kalit nakapausab sa dagan sa pagpuyo sa katawhan sa tibuok kalibutan. Nabalda ang sistema sa edukasyon nga nahimong online o digital ug modular aron paglikay sa virus. Ang paggusbat sa bagyong Odette sa Sugbo ug sa ubang bahin sa Kabisay-an ug Mindanao niadtong Disyembre 16, 2021.

Gawas sa natural nga katalagman, ang pulitika padayong nahimong samok ug gubot sa nasud. Wala makabwelo ang ekonomiya human wala matutoki pag-ayo tungod sa pagtumaw sa prayoridad sama sa pandemiya nga nagbutang sa tibuok nasod ubos sa state of calamity. Nakakomplikado mao ang dagan sa korapsiyon.

Dili sayop ang paghandom sa kagahapon. Maayong makuhaan kini og leksiyon nga mahimong lig-ong pundasyon sa plano nga tingusbawan ning tuig 2022. Sumala sa Insek, malaunom kita sa Tuig sa Tigre.

Leave a Reply

Your email address will not be published.