CCPO moabag sa Cebu City BPLO sa pag-monitor sa mga presyo
By Arnold Y. Bustamante
GISAAD sa kapulisan sa Siyudad sa Sugbo nga motabang sila sa Business Permit Licensing Office (BPLO) sa Cebu City Hall sa pag monitor sa mga tindahan nga mipaburot sa presyo sa ilang mga palaliton ning panahon sa kalamidad.
Daghan og nadawat nga mga impormasyon ang kagamhanan nga adunay mga negusyante nga sobra nga nakapamahal sa ilang mga baligya nga maoy gikinahanglan sa mga kabus sama sa bugas, tubig ug uban pa.
Matod ni Police Lieutenant Colonel Wilbert Parilla, deputy city director for operations, nga trabaho sa BPLO ang pagbantay sa presyo sa mga palaliton apan abagan nila kini.
Kagahapon, Disyembre 28, 2021, nilusad og inspection ang BPLO sa mga establisemento ug mga dagkong tindahan sa siyudad kon nituman ba sa lagda ni Mayor Michael Rama nga kinahanglan walay mopasaka sa presyo sa basic needs.
Hinuon, sigun ni Parilla nga wala pa sila makadawat og impormasyon labot sa pagpahimulos sa panahon sa mga negusyante.
“Mo-monitor ta, but ang aduna man guy tahas ani ang BPLO man, ang kapulisan igo lang nga mo assist nila sa pag conduct unyag apprehension,”matod ni Parilla.
Dugang ni Parilla nga lakip sa ilang gipang monitor karon ang pagguba o gipugos sa pag abli sa pipila ka mga residente sa mga fire hydrant aron lang maka kuhag tubig.
Matod ni Parilla nga iya nang gimandoan ang mga chief of police sa pag monitor aron mahatagan og proteksyon ang mga fire hydrant sanglit mahinungdanon kini tungod kay mao kini ang kuhaan sa tubig sa mga fire truck kon adunay motumaw nga sunog.
Kon adunay mga tawo nga moguba niini, dili magduha-duha sa pag sikop ang mga pulis.
“Ato nanang gipa check ug i-report sa MCWD if ever duna silay makit-an nga mga tawo nga mao gyuy nag-abli. And we will apprehend them,” matod ni Parilla.
Una nang nireklamo ang MCWD nga adunay mga stub-out sa tubig ang gipang pugos sa pag abli sa mga tawo aron makakuha lang og tubig.
Ang stub-out mao ang nagdugtong sa mainline ug linya nga duna nay water meter. Kuyaw kini kon maputol kay makontaminado ang tubig.
Di na usab makalahos ang supply nga tubig ngadto sa kabalayan nga nakakonektar sa linya.
Awhag sa MWCD sa publiko nga likayan sa pag himo tungod kay modako unya ang problema.
