16 ka mga LGU nakadawat og hinabang sa Daanbantayan
Ang lungsod sa Daanbantayan sa amihanang bahin sa Sugbo nidonar og tag P100,000 ngadto sa 16 ka local government units (LGU) sa habagatang bahin sa lalawigan nga grabeng gikuso-kuso sa Bagyong Odette (Rai).
Ang mga Dakbayan sa Carcar, Naga, Talisay, lungsod sa Argao, Dalaguete, Consolacion, Compostela, Cordova, Liloan, Minglanilla, San Fernando, ug Sibonga nakadawat sa hinabang pinansyal atol sa tigom nga gitambongan sa mga mayor ug mga pangulo sa nagkalain-laing ahensya sa gobyerno sa Miyerkules, Disyembre 22, 2021.
Ang tri-cities sa Cebu, Lapu-Lapu, Mandaue ug Dakbayan sa Danao gikatakda usab nga makadawat sa financial aide.
Matod pa ni Daanbantayan Mayor Sun Shimura nga matag maigo sa bagyo ang iyang lungsod, ang mga mayor gikan sa ubang LGUs kanunay nga naa sa pagtabang.
Karon nga nakalingkawas ang iyang lungsod sa pagkusokuso sa bagyong Odette, usa kini ka paagi sa paghatag og balik sa uban.
Si Talisay City Mayor Gerald Anthony “Samsam” Gullas ni-post sa iyang Facebook page sa Huwebes, Disyembre 23, aron pagpadayag sa iyang pasalamat sa hinabang pinansyal nga magamit sa iyang mga konstituwente nga naapektuhan pag-ayo sa bagyo.
Dugang pa ni Gullas nga nakatabang ang Daanbantayan sa dihang naigo kini sa bagyo niadtong 2019, apan wala sila magdahom nga dunay balos.
“To Daanbantayan Mayor Mr. Sun Shimura, you are greatly appreciated. We’re in awe of the kindness, empathy, and compassion that you have extended,” matod ni Gullas. (IRT)
