6,814 pamilya sa 11 ka barangay nibakwit sa baha - SunStar

6,814 pamilya sa 11 ka barangay nibakwit sa baha

Ni Edgar E. Fuerzas

COTABATO CITY — Gibahaan ang 11 ka barangay sa Datu Montawal, Maguindanao Province niadtong kaadlawon sa Disyembre 18, 2021 kon diin moabot sa 6,814 ka pamilya ang nanghikling.

Matud ni Datu Montawal Mayor Datu Otho Montawal nga nagtuo siya nga motaas pa ang lebel sa tubig gumikan sa dakong bul-og sa baha gikan sa Bukidnon ug Agusan River, ilabi na nga giingong catch basin sa baha ang nahisgutang lungsod ug ang kasikbit nga probinsiya sa Cotabato Province.

Nanawagan si Montawal kang Maguindanao Governor Bai Mariam Sangki Mangudadatu ug sa kagamhanang Bangsamoro Autonomouse Region in Muslim Mindanao (Barmm) og mga hinabang sa mga biktima sa baha.

Gihangyo sa nahisgutang mayor nga kalimtan una ang politika sa nagsingabot nga eleksiyon ug magtinabangay sa mga apektadong mga lugar.

Una na nang nag-apud-apod og hinabang ang LGU-Datu Montawal sa mga gibahaan apan wala pa nila masulod ang ubang dapit nga lagpas sa tawo ang lebel sa tubig.

Gawas sa Datu Montawal, gibaha sab ang Pagalungan, lakip na ang Pikit ug Kabacan tungod sa pagtaas sa lebel sa tubig sa Pulangi River, Rio Grande de Mindanao ug Liguasan Marsh.

Leave a Reply

Your email address will not be published.