27 na ka sunog miigo sa Cebu City sa Disyembre; kandila gibasol
ANG Cebu City Fire Office (CCFO) nitala og kinatibuk-ang 27 ka mga insidente sa sunog gikan sa Disyembre 1-27, 2021 nga dunay gibana-banang danyos nga balor og kapin sa P21 million.
Base sa ilang talaan, ang labing daghan nilang girespundihan mao ang bespiras sa Pasko, Disyembre 24, diin lima ka mga alarma ang ilang gitubag.
Ang nag-unang rason sa mga sunog mao ang mga kandila nga dinagkutan nga napasagdan.
Kadaghanan sa mga sunog nahitabo sa mga residential area.
IKA 27
Ang ika 27 nga sunog niigo sa mga alas 2 sa kaadlawon sa Lunes, Disyembre 27, sa Sityo Ipil-Ipil, Barangay Capitol Site.
Ang sunog niugdaw sa 27 ka mga balay ug nagbilin og labing minos P1.6 milyunes nga danyos ug niangol sa duha ka mga tawo.
Giila ni SFO1 Riza Vulve sa Cebu City Fire Office (CCFO) ang mga angol nga sila si Eleazar Montimeyor, 24, kinsa nasamad ang tuo nga kuyamoy sa tiil, ug si FO1 Ariel Jay Toron, 27, kinsa nasamad sa tuo nga palad.
Si Julve niingon nga ang sunog nakaapekto sa 35 ka mga pamilya.
Unang alarma ilang nadawat sa mga alas 2:01 sa kaadlawon. Nakontrolar ang sunog mga alas 3:28 ug hingpit nga napawong alas 3:52.
Sa Disyembre 25, Pasko, naigo sa sunog ang sityo Mansanitas, Brgy. Tisa, diin usa ka 25 anyos nga lalake ang namatay.
Ang biktima gikadenahan, apan wa mabadbad sa inahan kay ang yawe sa kandado nadala sa bana.
Sunod nga naigo sa sunog sa samang adlaw mao ang residential ug balay patigayon sa dan Urgello, Brgy. Sambag 2. (REV, JOB)