ANG Metropolitan Cebu Water District (MCWD) tipik na nga nakapabalik sa water supply sa dili mominos 79 ka mga barangay o 47 porsiyento sa kinatibuk-ang 168 ka mga barangay nga gialagaran sa water district.
Sa Disyembre 27, ang MCWD nakapaagas og 133,300 cubic meters nga tubig kada adlaw o 55.6% sa kinatibuk-ang normal nga produksiyon niini nga 240,000 cubic meters kada adlaw.
Kini nagpasabot nga labing menos 120,000 sa 200,000 sa kinatibuk-ang koneksyon sa serbisyo aduna nay nagaagas nga tubig.
Ang suplay sa tubig gikan sa 62 ka mga atabay nga nag-andar na karon, 36 ang gipaandar sa generator sets samtang 26 ang Veco-energized.
Ang MCWD adunay kinatibuk-ang 138 ka mga atabay sa produksiyon sa lain-laing mga dapit sulod sa iyang service area – Cebu City, Mandaue City, Lapu-Lapu City, Talisay City, Consolacion, Liloan, Compostela ug Cordova.
Human sa bagyo, ang Production and Distribution Department (PDD) sa MCWD nipakatap dayon og generator sets aron sugdan ang restoration efforts sa water district.
Si Tommy Gonzales, PDD acting manager, nipasabot nga lakip sa ilang gikonsiderar sa pag-deploy sa generator sets mao ang accessibility sa mga bomba, nga nagpasabot nga ang nahimutangan dili mababagan sa nangatumba nga mga kahoy ug uban pang debris, ingon man ang compatibility niini sa electrical rating sa atabay.
Ang mga bomba nga tinubdan sa tubig nga direktang gipaagas sa mga konsumidor giuna usab.
Karon nga nahatagan na og kuryente sa Veco ang 26 ka mga atabay sa MCWD, ang generator sets ibalhin sa ubang mga atabay nga wala pay kuryente ug nahimutang sa mga dapit nga dili maabot sa suplay gikan sa mga atabay nga gipaandar sa Veco.
Pipila sa mga atabay sa MCWD sama sa Lagtang, Casili ug Jaclupan adunay ‘in-place’ generator sets ug ang usa ka generator set makapa-energize sa cluster sa mga atabay.
Kini nga mga generator set naggamit sa linya sa kuryente sa Veco aron maka-supply og kuryente sa sobra sa usa ka atabay.
Kon matumba sa bagyo ang linya sa Veco nga konektado sa generator set, dili dayon mapaandar ang mga atabay ug maghuwat pa kini sa power company sa pag-ayo sa linya.
Sa laing bahin, subling gisulti sa water district nga ang tubig sa MCWD limpyo ug luwas nga mainom.
Nanawagan kini sa mga konsumidor kansang serbisyo sa tubig nabalik nga dili moapil sa taas nga linya sa mga istasyon sa pagpuno sa tubig ug hatagan og higayon ang way magamit nga tubig nga mainom.
Gihangyo usab niini ang publiko nga dili gub-on ang water meter standpipe ug stub-outs aron lang makakuha og tubig.
Ang pagkaguba sa mga stub-out mahimong moresulta sa kontaminasyon sa tubig ug makasamot sa kanihit sa suplay tungod kay ang tubig nausik tungod kay dili makontrol ang agos gikan sa nadaot nga mga stub-out. (REV gikan sa PR)
