10,000 ka mamalitay misud sa Carbon sugod sa alas 4 sa kaadlawon
MAORAG wa agii og bagyo kay sulod sa pito ka oras, kun gikan sa alas 4 sa kaadlawon hangtod sa alas 11 sa buntag, ang Carbon Police Station naka tala og 10,000 ka mga mamalitay nga ningsulod sa Carbon market aron mangompra og pang Noche Buena.
Matod sa hepe sa Carbon Police, Major Kenneth Paul Albotra, sa pakighinabi sa Superbalita ug SunStar Cebu, mao kini ang ilang pag bana-bana sa gidaghanon sa mga mamalitay nga ningsulod na sa merkado publiko.
Dugang ni Albotra nga ila nang gipaabot nga mosaka pa ang gidaghanon sa mga mamalitay sanglit sayo pa ug taas ang oras.
“Dunay uban niana nga mangompra og hapon kay likay sa init mao nang amo nang gimonitor kay aron mapatuman nato ang health protocol,” matod nil Albotra.
Awhag lang niya sa mga mamalitay nga sayod nang tanan nga ana-a pa sa pandemiya, tumanon lang gyud aron malikayan ang pagkatap sa virus.
Dugang niya nga gikan sa sayo sa buntag hangtud ning pag suwat, walay natala nga mga insidente ilabi na sa pag pangawat.
“Zero ta sa karon ug manghinaut ko nga magpadayon ni,” dugang ni Albotra. (BBT)
