2 magsuon, 2 pulis patay sa pinusilay
CENTRAL MINDANAO – Upat ang namatay sa pinusilay mga alas 5:30 kagahapon sa buntag didto sa probinsya sa Cotabato.
Sa report sa North Cotabato PNP, nagpahigayon og surveillance operation sila P/CMS Fletcherlyn Dominic Pido ug P/SSG Arman Bada sa gipuy-an ni Jerson Papna nga dunay warrant of arrest sa kaso nga pagpatay apan nakamatikod ang managsoong Papna diin natigayon ang pinusilay.
Nailhan ang mga namatay nga sila Jerson Papna, 35-anyos ug ang igsuon niini nga si John Kevin Papna, 26, mga negusyante ug mga residente sa Purok 1 Barangay Bialong, M’lang Cotabato.
Sa pinakaulahing report, giingong namatay sab ang duha ka mga pulis nga sila Pido ug Bada.
Subay sa taho sa otoridad nahitabo ang pinusilay sa JK Kambingan sa Purok 1 Barangay Bialong M’lang Cotabato.
Unang napatay si Jerson Papna diin nakabalos ang iyang igsuon padung sa duha ka pulis una kini nakabsan sa kinabuhi.
Sa pagsuwat ning balita kagahapon sa hapon nagpadayon pa ang kapulisan sa ilang makuti nga imbestigasyon aron ma-establisar ang matuod nga hinungdan sa pinusilay. Edgar E. Fuerzas
